Joel Dias: "Ruslan Abdullayev kelasi yildayoq jahon chempioni boʻlishi mumkin"

Bu fikrni turli davrlarda beshta jahon chempioni bilan ishlagan mashhur murabbiy, bir necha yildan beri Kaliforniyadagi bokschilarimizga ustozlik qilib kelayotgan Joel Dias bildirgan.

"Bunday yigitlar boksda har oʻn yilda bir marta paydo boʻladi, - dedi Dias Abdullayev haqida The Ring nashriga bergan intervyusida. - "Golden Boy" promouterlik kompaniyasi Ruslanni kelajagi porloq bokschi sifatida koʻrayotgani juda yaxshi. Professionallar safida tajribasi kam boʻlishiga qaramay, u allaqachon kuchli raqiblar bilan toʻqnash kelmoqda. Bu esa promouterlarning unga ishonishi va katta rejalari borligidan dalolatdir. Ruslan timsolida katta salohiyatni koʻryapman. U texnikasi juda yuqori, koʻp qirrali jangchi. Uning kuchli zarbasi bor, hujum va himoyada mahorati ham yuqori. Abdullayev jismonan kuchli, chaqqon va aqlli. U kelasi yili oltita jang oʻtkazib, chempion boʻlishi aniq - u allaqachon shu darajaga yetgan".

Kelasi oyda 23 yoshni qarshilaydigan Ruslan Abdullayev 2023 yilda -63,5 kg vazn toifasida jahon chempionatining oltin medaliga sazovor boʻlgan. U professional ringdagi debyutini shu yilning mart oyida oʻtkazib, ikkinchi raundda Xose Alvarado (3-19-1, 2KO)ni nokautga uchratgandi. Ushbu magʻlubiyat Alvarado faoliyatidagi ilk muddatidan oldingi magʻlubiyat boʻlgan edi.

Ruslan Abdullayev professional boksdagi ikkinchi jangida Jino Rodrigo (13-4-2, 11KO)ni bir ovozdan (barcha hakamlik yozuvlarida 80-71) magʻlub etgan boʻlsa, uchinchi jangida Kevin Jonson (12-7, 8KO)dan ham hakamlarning yakdil qarori bilan (80-72, 79-73, 79-73) ustun kelgandi.