Oʻzbekiston boksi jahon yetakchilari safida

Liverpul shahrida oʻtgan World Boxing tashkilotining tarixdagi ilk jahon chempionatida Oʻzbekiston erkaklar terma jamoasi 6 ta oltin medal qoʻlga kiritdi. Bu natija musobaqa tarixida ham, jahon boksi miqyosida ham rekord sifatida baholandi.

Dubay shahrida IBA tashkil etgan jahon chempionati esa yana bir tarixiy voqea bilan yodda qoldi. Oʻzbekistonlik bokschi Asadxoʻja Muydinxoʻjayev kattalar oʻrtasida uch karra jahon chempioni boʻlgan ilk oʻzbek sportchisiga aylandi.

Bunga qadar ayrim bokschilarimiz ikki martadan jahon chempionatida gʻalaba qozongan. Jumladan, Ruslan Chagayev, Abbos Atoyev, Baxodir Jalolov, Abdumalik Xoloqov va Hasanboy Dusmatov ikki karra jahon chempionlari hisoblanadi. Ammo Asadxoʻja Muydinxoʻjayev 2023 yil Toshkentda va 2025 yilda har ikki tashkilot oʻtkazgan jahon chempionatlarida oltin medal qoʻlga kiritib, yangi tarix yaratdi.

Qayd etish joizki, Olimpiya dasturiga kiritilgan sport turlari boʻyicha ham Oʻzbekiston katta yutuqlarga erishmoqda. Hozirgacha uch karra jahon chempioni boʻlgan oʻzbekistonlik sportchilar soni toʻrt nafarga yetdi. Asadxoʻja Muydinxoʻjayevdan avval bu natijaga sport gimnastikasi vakili Oksana Chusovitina, shuningdek, ogʻir atletikachilar Ruslan Nuriddinov va Akbar Joʻrayev erishgan edi.

Xulosa qilib aytganda, oʻzbek sporti yangi tarix yaratish arafasida. Mavjud salohiyat va natijalar kelgusida yanada katta gʻalabalarga umid uygʻotmoqda.