Shahram Gʻiyosovning promouterlari chempionlik jangi uchun oxirigacha kurashishga tayyor

Eddi Xirn boshchiligidagi promouterlik kompaniyasi jangni kim oshdi savdosi orqali tashkil etishga toʻgʻri kelsa ham, ushbu chempionlik toʻqnashuvini amalga oshirishga qatʼiy bel bogʻlagan.

WBA tashkiloti yaqinda Romeroga Gʻiyosovga qarshi chempionlik kamarini majburiy himoya qilishni buyurgan. Bu qarordan keyin tomonlar jangni tashkil etish boʻyicha faol muzokaralarga kirishgan.

“Biz Romero bilan ishlaydigan Luis De Kubaz bilan muloqotdamiz. Umid qilamizki, jang kelasi yil boshida boʻlib oʻtadi”, — dedi Matchroom direktori Frenk Smit Boxing Newsnashriga bergan intervyusida.

“Agar savdolar boʻlib oʻtsa ham, biz kelishuvga erishishga harakat qilamiz. Shahram bu imkoniyatga loyiq — u jahon chempioni unvoni uchun jang qilishga katta mehnat qildi. Menimcha, u Romeroni yengadi”, — deya qoʻshimcha qildi u.

Eslatib oʻtamiz, Shahram Gʻiyosov shu yil aprel oyida AQShdagi boks kechasida argentinalik Franko Maksimiliano Okamponi magʻlub etgan edi. U oʻsha vaqtda qizini yoʻqotganiga qaramasdan, qattiq iroda koʻrsatib, gʻalaba qozongandi.

“Men qizimga jahon chempioni boʻlishga vaʼda berganman. U meni koʻrib turibdi va duo qilyapti. Men bu vaʼdamni bajaraman”, — degandi Gʻiyosov jangdan keyingi soʻzlarida.