Jurnalist va blogerlar ishlari boʻyicha soʻnggi maʼlumotlar eʼlon qilindi

Anora Sodiqovaning daʼvosi boʻyicha qaror kuchda qoldirildi

Bugun Toshkent shahar sudining fuqarolik ishlari boʻyicha sudlov hayʼati taftish instansiyasida jurnalist Anora Sodiqovaning Toshkent viloyati hokimligi mulozimi Mirsaid Haydarovga nisbatan daʼvosi koʻrib chiqildi. Sud avvalgi instansiya qaroriga oʻzgartish kiritmay, Sodiqovaning foydasiga chiqarilgan qarorni kuchda qoldirdi.

Behzod Qobulov yuzasidan tergovoldi surishtiruv boshlandi

Toshkent viloyati hokimining sobiq matbuot kotibi Behzod Qobulovga nisbatan tergovoldi surishtiruv ishlari boshlangani xabar qilindi. Tergov bloger Babasheva va Toʻlaganovlarning arizalari asosida boshlangan.

Otabek Ahliddinovning arizasi qanoatlantirilmadi

Andijonlik bloger Otabek Ahliddinovning manzil-koloniyaga oʻtkazish toʻgʻrisidagi arizasi Navoiy shahar sudi tomonidan qanoatlantirilmadi. Sud blogerning jazo oʻtash davrida qoidalarni buzganini inobatga olgan holda uni Navoiy qamoqxonasida qoldirish haqida qaror chiqardi.

Guli Mirzayeva shartli ozodlikka chiqarildi

Fargʻonalik bloger Guli Mirzayeva Zangiotadagi ayollar koloniyasidan shartli ozodlikka chiqarildi. Shu koloniyada blogerlar Lemara Mirzaaxmedova, Sitora Bozorova hamda Dildora Boymurodovalar jazo muddatlarini oʻtashni davom ettirmoqda.

Ayrim blogerlar boʻyicha yangilik yoʻq

Huquq faolining aytishicha, ayrim jazoni ijro etish muassasalarida saqlanayotgan blogerlar — Buxorodagi 1-sonli koloniyada Qobil Doʻstov, Tovoqsoyda Xurshid Daliyev, Koson tumanida jazo oʻtayotgan fargʻonalik bloger Olimjon Haydarov ishlari boʻyicha yangi maʼlumotlar mavjud emas.