Журналист ва блогерлар ишлари бўйича сўнгги маълумотлар эълон қилинди

Анора Содиқованинг даъвоси бўйича қарор кучда қолдирилди

Бугун Тошкент шаҳар судининг фуқаролик ишлари бўйича судлов ҳайъати тафтиш инстанциясида журналист Анора Содиқованинг Тошкент вилояти ҳокимлиги мулозими Мирсаид Ҳайдаровга нисбатан даъвоси кўриб чиқилди. Суд аввалги инстанция қарорига ўзгартиш киритмай, Содиқованинг фойдасига чиқарилган қарорни кучда қолдирди.

Беҳзод Қобулов юзасидан терговолди суриштирув бошланди

Тошкент вилояти ҳокимининг собиқ матбуот котиби Беҳзод Қобуловга нисбатан терговолди суриштирув ишлари бошлангани хабар қилинди. Тергов блогер Бабашева ва Тўлагановларнинг аризалари асосида бошланган.

Отабек Аҳлиддиновнинг аризаси қаноатлантирилмади

Андижонлик блогер Отабек Аҳлиддиновнинг манзил-колонияга ўтказиш тўғрисидаги аризаси Навоий шаҳар суди томонидан қаноатлантирилмади. Суд блогернинг жазо ўташ даврида қоидаларни бузганини инобатга олган ҳолда уни Навоий қамоқхонасида қолдириш ҳақида қарор чиқарди.

Гули Мирзаева шартли озодликка чиқарилди

Фарғоналик блогер Гули Мирзаева Зангиотадаги аёллар колониясидан шартли озодликка чиқарилди. Шу колонияда блогерлар Лемара Мирзаахмедова, Ситора Бозорова ҳамда Дилдора Боймуродовалар жазо муддатларини ўташни давом эттирмоқда.

Айрим блогерлар бўйича янгилик йўқ

Ҳуқуқ фаолининг айтишича, айрим жазони ижро этиш муассасаларида сақланаётган блогерлар — Бухородаги 1-сонли колонияда Қобил Дўстов, Товоқсойда Хуршид Далиев, Косон туманида жазо ўтаётган фарғоналик блогер Олимжон Ҳайдаров ишлари бўйича янги маълумотлар мавжуд эмас.