"Kimgadir yoqadimi-yoʻqmi, biz YI bilan hamkorlikni davom ettiramiz" — Abdulaziz Komilov

Oʻzbekiston prezidenti huzuridagi Xavfsizlik kengashi kotibi oʻrinbosari, davlat rahbarining tashqi siyosat masalalari boʻyicha maxsus vakili Abdulaziz Komilov "Markaziy Osiyo+" formatidagi xalqaro hamkorlik, jumladan Yevropa Ittifoqi bilan boyib borayotgani haqida gapirdi.

Uning aytishicha, Markaziy Osiyo davlatlari tarixda birinchi boʻlib, yagona subʼekt sifatida oʻzlarining yangi mavqelarini namoyish qilmoqda. Bu mavqeni xalqaro hamjamiyat tan olyapti va mana shu asosida yangi shakllar paydo boʻlmoqda. U "Markaziy Osiyo +" formatlarining soni oʻndan oshganligini maʼlum qildi.

U joriy yilning aprel oyida Samarqandda boʻlib oʻtgan "Yevropa ittifoqi + Markaziy Osiyo" sammiti strategik sheriklikni mustahkamlash yoʻlida muhim qadam ekanligini taʼkidladi.

"Markaziy Osiyo davlatlarining siyosati — juda pragmatik siyosat. Solishtirib koʻring: Markaziy Osiyoda 5 ta davlat bor, Yevropa Ittifoqida — 28 ta. Yevropa Ittifoqining byudjeti taxminan 19 trillion AQSh dollar. Albatta, bizning pragmatik manfaatimiz bor va bular bilan qandaydir shartlar boʻladimi, boʻlmaydimi, kimgadir yoqadimi, yoqmaydimi, biz, albatta, mana shu hamkorlikda davom etamiz",  deydi u.

Komilovning fikricha, mintaqa mamlakatlari dunyoning boshqa qismlariga namuna boʻlmoqda.

"Koʻpincha ekspertlar va koʻzga koʻringan siyosatchilar aytyaptiki, Markaziy Osiyo boshqalarga namuna, model boʻlishi mumkin. Qoʻshni davlatlar doʻstona aloqalarni oʻrnatib, mana shu yaxshi qoʻshnichilik tamoyili asosida aloqalarni, doʻstligini rivojlantirishi mumkin. Mintaqaviy oʻziga xoslik — mana shu subʼektlikka oʻxshagan gʻoya Markaziy Osiyo mamlakatlari hamkorligi poydevorini mustahkam qiladigan eng muhim omildir", dedi u.