"Кимгадир ёқадими-йўқми, биз ЙИ билан ҳамкорликни давом эттирамиз" — Абдулазиз Комилов

Ўзбекистон президенти ҳузуридаги Хавфсизлик кенгаши котиби ўринбосари, давлат раҳбарининг ташқи сиёсат масалалари бўйича махсус вакили Абдулазиз Комилов "Марказий Осиё+" форматидаги халқаро ҳамкорлик, жумладан Европа Иттифоқи билан бойиб бораётгани ҳақида гапирди.

Унинг айтишича, Марказий Осиё давлатлари тарихда биринчи бўлиб, ягона субъект сифатида ўзларининг янги мавқеларини намойиш қилмоқда. Бу мавқени халқаро ҳамжамият тан оляпти ва мана шу асосида янги шакллар пайдо бўлмоқда. У "Марказий Осиё +" форматларининг сони ўндан ошганлигини маълум қилди.

У жорий йилнинг апрель ойида Самарқандда бўлиб ўтган "Европа иттифоқи + Марказий Осиё" саммити стратегик шерикликни мустаҳкамлаш йўлида муҳим қадам эканлигини таъкидлади.

"Марказий Осиё давлатларининг сиёсати — жуда прагматик сиёсат. Солиштириб кўринг: Марказий Осиёда 5 та давлат бор, Европа Иттифоқида — 28 та. Европа Иттифоқининг бюджети тахминан 19 триллион АҚШ доллар. Албатта, бизнинг прагматик манфаатимиз бор ва булар билан қандайдир шартлар бўладими, бўлмайдими, кимгадир ёқадими, ёқмайдими, биз, албатта, мана шу ҳамкорликда давом этамиз",  дейди у.

Комиловнинг фикрича, минтақа мамлакатлари дунёнинг бошқа қисмларига намуна бўлмоқда.

"Кўпинча экспертлар ва кўзга кўринган сиёсатчилар айтяптики, Марказий Осиё бошқаларга намуна, модель бўлиши мумкин. Қўшни давлатлар дўстона алоқаларни ўрнатиб, мана шу яхши қўшничилик тамойили асосида алоқаларни, дўстлигини ривожлантириши мумкин. Минтақавий ўзига хослик — мана шу субъектликка ўхшаган ғоя Марказий Осиё мамлакатлари ҳамкорлиги пойдеворини мустаҳкам қиладиган энг муҳим омилдир", деди у.