Apple iPhone patentini buzganligi uchun $5,7 milliard to‘laydi

Apple kompaniyasi bildirishnoma kelganda yoki tugma bosilganda seziladigan tebranishlarni ta’minlash uchun Taction Technology kompaniyasining patentlangan texnologiyasidan foydalangan.

Shu sababli Apple kompaniyasiga 5,7 milliard dollardan ortiq to‘lov qilish majburiyati yuklatildi.

Kaliforniya janubiy okrugi federal sudidagi hakamlar hay’ati iPhone ishlab chiqaruvchisi San-Diegoda joylashgan kompaniyaga tegishli ikkita patentni buzgan deb topdi.

“Hay’at Taction foydasiga qaror chiqargani va kompaniyaning patent huquqlarini tasdiqlagani bizni xursand qildi”, – dedi Taction kompaniyasining advokati Lens Yang.

Mazkur hukm 2021-yilda boshlangan sud jarayonining yakunidir. O‘shanda Taction ilk bor Apple kompaniyasiga qarshi da’vo arizasi bilan murojaat qilgan. 2023-yilda federal sudya Apple Taction kompaniyasining patentlarini buzmagan, degan qarorga kelgan edi. Biroq apellyatsiya sudi o‘tgan yili ishni qayta ko‘rib chiqish uchun tikladi.

“Taction kompaniyasining innovatsiyalari va muvaffaqiyatidan foydalanib, Apple Taction patentlarini buzadigan qurilmalarni sotmoqda. Apple Taction tomonidan patentlangan ixtirolardan kompaniyaning litsenziyasi yoki ruxsatisiz foydalanmoqda. Taction Apple tomonidan sodir etilgan patent huquqlari buzilishini bartaraf etish uchun ushbu da’voni kiritdi”, — deyiladi Taction tomonidan dastlab taqdim etilgan 31 sahifalik da’vo arizasida.

Biroq hakamlar hay’ati Apple patentlarni qasddan buzmagan deb topdi.

Apple qaror ustidan shikoyat qilishni rejalashtirayotganini ma’lum qildi.

“Apple’ning Taptic Engine texnologiyasi Taction texnologiyasidan tubdan farq qiladi, buni sud jarayonida Taction’ning o‘zi ham Apple mahsulotlarini sinovdan o‘tkazganida tasdiqladi”, — deya javob berdi Apple.

Hukm kompaniya uchun hal qiluvchi pallada, yuqori tizimdagi o‘zgarishlar fonida e’lon qilindi. Texnologik gigant o‘zining sun’iy intellekt mahsulotlarini ishlab chiqarishda boshqa yirik kompaniyalardan ortda qolayotgan bir paytda rahbariyat o‘zgardi.

Dushanba kuni savdolar boshlanishi bilan Apple aksiyalari taxminan ikki foizga pasaydi.