Sun’iy intellektda yaratilgan aktyor va senariylarga “Oskar” berilmaydi

Juma kuni “Oskar” mukofoti tashkilotchilari kino sanoatining eng yuksak sovrinlariga sazovor bo‘lish uchun aktyorlik mahorati va senariy muallifligi sun’iy intellekt tomonidan emas, balki inson tomonidan bajarilishi shartligini belgilovchi yangi qoidalarni e’lon qildi.

Generativ sun’iy intellekt kino va televideniye sohasida katta tashvish uyg‘otdi. Xodimlar studiyalar xarajatlarni kamaytirish maqsadida ushbu texnologiyadan inson mehnati o‘rnida foydalanishidan qo‘rqishmoqda.

O‘tgan yili sun’iy intellekt yordamida yaratilgan va Tilli Norvud deb nomlangan “aktrisa”ning debyuti hamda uning prodyuseriga bildirilayotgan qiziqishlar va  maqtovlar mavjud xavotirlarni kuchaytirib, SAG-AFTRA aktyorlar uyushmasining keskin noroziligiga sabab bo‘ldi.

Akademiyaning yangi qoidalariga ko‘ra, kinoijodkorlar sun’iy intellekt vositalaridan foydalanishi mumkin, biroq Norvud kabi “sintetik” aktyor “Oskar” mukofotiga da’vogarlik qila olmaydi.

Shuningdek, bayonotda ssenariylar ko‘rib chiqilishi uchun “inson tomonidan yozilgan” bo‘lishi kerakligi ta’kidlangan.

Akademiya topshirilgan ishlar inson tomonidan yaratilganini tekshirish uchun qo‘shimcha ma’lumot talab qilishi mumkin.