Mahmud Abbos: “Olti davlatning Falastinni tan olishi — adolatli tinchlik oʻrnatish yoʻlida muhim qadam boʻldi”

Falastin axborot agentligi WAFA tarqatgan maʼlumotga koʻra, Abbos Fransiya, Belgiya, Lyuksemburg, Malta, Monako va Andorra rasman mustaqil hamda suveren Falastin davlatini tan olganidan mamnunligini bildirdi.

Unga koʻra, xalqaro hamjamiyat qarorlariga uygʻun boʻlgan mazkur qadam ikki davlatli yechimni amalga oshirish yoʻlini ochadi hamda Falastinning Isroil bilan «xavfsizlik, tinchlik va qoʻshnichilik munosabatlari» asosida yashashiga sharoit yaratadi.

Falastin rahbari shuningdek, asosiy ustuvor maqsad sifatida quyidagilarni sanab oʻtdi:

otashkesimga erishish;

Gʻazoga gumanitar yordam yetkazish;

barcha asir va garovdagilarni ozod qilish;

Isroil qoʻshinlarini toʻliq chiqarib yuborish;

barcha falastinlik tuzilmalarning masʼuliyatini taʼminlash;

hududni tiklash va qayta qurish;

mustamlakachilik va isroillik koʻchmanchilar terrorini toʻxtatish.

Abbos yana bir bor taʼkidladiki, Falastin davlati oʻzining barcha majburiyatlari va islohotlarini bajaradi.

Eslatib oʻtamiz, kuni kecha Fransiya, Belgiya, Lyuksemburg, Malta, Monako va Andorra rasman Falastin davlatini tan oldi.