Маҳмуд Аббос: “Олти давлатнинг Фаластинни тан олиши — адолатли тинчлик ўрнатиш йўлида муҳим қадам бўлди”

Фаластин ахборот агентлиги WAFA тарқатган маълумотга кўра, Аббос Франция, Бельгия, Люксембург, Мальта, Монако ва Андорра расман мустақил ҳамда суверен Фаластин давлатини тан олганидан мамнунлигини билдирди.

Унга кўра, халқаро ҳамжамият қарорларига уйғун бўлган мазкур қадам икки давлатли ечимни амалга ошириш йўлини очади ҳамда Фаластиннинг Исроил билан «хавфсизлик, тинчлик ва қўшничилик муносабатлари» асосида яшашига шароит яратади.

Фаластин раҳбари шунингдек, асосий устувор мақсад сифатида қуйидагиларни санаб ўтди:

оташкесимга эришиш;

Ғазога гуманитар ёрдам етказиш;

барча асир ва гаровдагиларни озод қилиш;

Исроил қўшинларини тўлиқ чиқариб юбориш;

барча фаластинлик тузилмаларнинг масъулиятини таъминлаш;

ҳудудни тиклаш ва қайта қуриш;

мустамлакачилик ва исроиллик кўчманчилар террорини тўхтатиш.

Аббос яна бир бор таъкидладики, Фаластин давлати ўзининг барча мажбуриятлари ва ислоҳотларини бажаради.

Эслатиб ўтамиз, куни кеча Франция, Бельгия, Люксембург, Мальта, Монако ва Андорра расман Фаластин давлатини тан олди.