Raqamlarga aylangan falastinliklar: 7 oktabr voqealariga 2 yil toʻldi

Roppa-rosa 2 yil muqaddam – 2023 yilning 7 oktabr kuni HAMAS Isroil harbiy bazalariga keng koʻlamli hujumlarni amalga oshirdi. “Al-Aqso toʻfoni” nomini olgan mazkur amaliyot chogʻida, rasmiy manbalarga koʻra, 1200 kishi, shu jumladan, musiqa festivalining 364 ishtirokchisi oʻldirildi, 253 kishi asirga olindi. Mazkur hujum Gʻazo sektori va Iordan daryosining Gʻarbiy sohilida oʻn minglab falastinliklarning oʻlimiga, jarohatlanishiga va dahshatli azoblar girdobida qolishiga sabab boʻlgan Isroil qatliomiga sabab boʻldi.

Eng dahshatlisi, butun dunyo, ikki yildirki, falastinliklarning bombalar yomgʻiri ostida, har tomonlama qamal holatida qanday halok boʻlayotgani, ochlik, kasallik, chorasizlikdan azob chekayotganini onlayn tomosha qilmoqda. Turli minbarlarda bu qatliom qoralanayotgani, urush va qirgʻinbarotlarga chek qoʻyish chaqiriqlari yangrayotganiga qamasdan, hozircha deyarli hech qanday amaliy natijaga erishilgani yoʻq. Falastinliklar koʻz oʻngimizda raqamlarga, statistik maʼlumotlarga va tarixiy fakt-dalillarga aylanmoqda. Goʻyo ular haqdagi fakt va raqamlarni keltirsak, insonlar rahmini keltirib, koʻzlarini yoshlay olsak, nimadir oʻzgaradigandek tinimsiz ravishda bugun va shu paytgacha nechta falastinlik oʻlgani, qanchasi hujumlardan, qanchasi ochlikdan, qanchasi kasalliklardan halok boʻlganini eʼlon qilib boryapmiz. 

Hukumatlardan amaliy harakat chiqmagach, bir guruh faollar Global Sumud (matonat) flotiliyasini tashkil etib, insonparvarlik yuklari bilan kemalarga Gʻazo sari yoʻlga chiqishdi. Tabiiyki, barcha urinishlar Isroil tomonidan toʻxtatildi, faollar qoʻlga olindi. 

Ha, Isroil ham, aniqrogʻi isroilliklar ham koʻp narsani yoʻqotmoqda. Rasmiy maʼlumotlarga koʻra, 7 oktabrdan shu paytga qadar Gʻazo va Livan chegarasida 1152 ta Isroil xavfsizlik kuchlari xodimi oʻldi, 6313 harbiy jarohatlandi. 30 mingdan ortiq isroillik ruhiy muammolar tufayli shifokorlarga murojaat qilgan. Isroilning xalqaro siyosiy-ijtimoiy mavqeyi yer bilan bir boʻldi. Ammo... Sulh kelishuvi jarayonlarida ham hujumlar toʻxtamadi, hatto HAMASning sulh hayʼatini yoʻq qilish uchun Qatar poytaxtiga hujum amalga oshirildi. Isroilning maqsadi Gʻazo va Gʻarbiy Sohilni butunlay egallab olish, falastinliklarni yoʻq qilishdan iborat va hozircha hech qaysi kuch Isroilni bu maqsadida qaytara olgani yoʻq. 

Biz esa tomoshabin sifatida qandaydir ilohiy aralashuvni kutyapmiz. Ha, nimadir boʻladi, ammo unga qadar statistik maʼlumotlarni oʻqib, oʻzimizni rahmli insondek his qilib turaylik-chi.

Falastinliklar statistik maʼlumotlar sifatida

2023 yil 8 oktabridan buyon Isroilning Gʻazo sektoriga uyushtirgan hujumlari natijasida:

kamida 67 160 falastinlik halok boʻldi. Ularning 20 mingdan ziyodi bolalar, 12,5 mingdan ortigʻi ayollardir;

460 kishi, jumladan, 154 bola ochlik va yetarli ovqatlanmaslikdan;

17 kishi, jumladan, 14 bola sovuqdan;

23 falastinlik havodan tashlangan insonparvarlik yuklari ostida qolib;

2 610 kishi yordam tarqatish punktlarida qasddan uyushtirilgan hujumlarda halok boʻldi, 19 ming 143 kishi yaralandi;

169 ming 679 kishi yaralandi;

268 ming uy butunlay, 153 tasi qisman vayron qilindi;

288 ming falastinlik oila uysiz qoldi;

38 ta shifoxona;

96 ta sogʻliq markazi;

725 ta markaziy quduq;

5 080 km elektr tarmogʻi;

247 ta hukumat binosi;

208 ta arxeologik va madaniy meros obʼekti;

292 ta inshoot, oʻyin maydoni va sport zali yoʻq qilindi.

Isroil Amerika koʻmagida 365 kv km maydondagi Gʻazo sektoriga 100 ming tonnadan ziyod miqdorda bomba tashladi. Maʼlumot uchun, poytaxtimiz Toshkentning maydoni 435 kv. km.