"Navbahor"dan transfer taqiqi yechildi

FIFA "Navbahor" klubidan transfer taqiqini olib tashladi. Bu haqda PFL matbuot xizmati maʼlum qildi.

Yozgi transfer oynasida yangi futbolchilarni roʻyxatdan oʻtkazish uchun "Navbahor" uch bosqichda ish olib borishi lozimligi taʼkidlangandi. 

24 iyul kuni FIFA "Navbahor" klubiga nisbatan belgilangan transfer taqiqini olib tashladi. Mazkur taqiq Giorgi Nikabadze oʻz maoshini vaqtida olmagani ortidan qoʻyilgandi. Maʼlum boʻlishicha, klub bu borada oʻz majburiyatini toʻliq bajargan.

Endilikda "Navbahor" oʻzbekistonlik futbolchilar oldidagi majburiyatlarini ado etishga kirishgan. Liga ayni vaqtda mazkur masala qanday davom etayotganiga oydinlik kiritmoqda. Klub va futbolchilar oʻrtasidagi kelishuvga koʻra, Namangan klubi shu yilning 1 iyul sanasiga qadar qarzdorlikni yopishi lozim edi. Mazkur sana viloyat hokimi tomonidan berilgan kafolat xatida koʻrsatib oʻtilgan. 

Shuningdek, Ligaga toʻgʻridan-toʻgʻri murojaat kiritgan sobiq murabbiy va boshqa mahalliy futbolchilar oldidagi majburiyatlar ham hal qilinishi lozim. 

Maʼlumot uchun, 30 iyul kuni Oʻzbekistonda yozgi transfer oynasi yopiladi.