«Neftchi» haqidagi bayonoti uchun Berdiyevga nisbatan tekshiruv boshlandi

26 oktabr kuni boʻlib oʻtgan «OKMK» – «Nasaf» bahsi (1:1) ortidan Berdiyevning soʻzlari keng jamoatchilikda qizgʻin muhokamalarga sabab boʻldi. U «Neftchi» klubi haqida toʻxtalar ekan, shunday degan:

«Hamma “Neftchi” haqida gapiryapti, ammo biz ham sukut saqlamaymiz. Jamoamiz uzoq vaqtdan beri magʻlubiyatsiz seriyani davom ettirmoqda va chempionlikka munosib. “Neftchi”ning orqada qanday yoʻl tutayotganini ham koʻrib turibsiz. Agar ular vazifani bajarsa, qahramonlar maydonda emas, boshqa yerda qidirilishiga toʻgʻri keladi. Nima demoqchiman, anglab olgan boʻlsangiz kerak».

Shu bilan birga, murabbiy «ortdagi odamlar» deganda kimlarni nazarda tutganini ochiqlamadi.

OʻFA ushbu bayonotni oʻrganib chiqishini va xulosaga koʻra huquqiy choralar belgilanishini bildirdi.

Eslatib oʻtamiz, 26-turdan keyin «Neftchi» 57 ochko bilan «Nasaf»dan ustunlikka chiqdi. Ikki jamoa bir xil ochko toʻplagan boʻlsa-da, oʻzaro oʻyinlardagi natija «Neftchi» foydasiga (1:0, 1:1). Qolgan 4 turda ular ochko yoʻqotmasa, chempionlikni qoʻlga kiritishi mumkin.