Nukusda kichik hajmli bolalar uyi ish boshladi

Oʻzbekiston Respublikasi prezidenti huzuridagi Ijtimoiy himoya milliy agentligi Qoraqalpogʻiston Respublikasi boshqarmasi tomonidan Nukus shahrida zamonaviy va qulay sharoitlarga ega kichik hajmli bolalar uyi faoliyati yoʻlga qoʻyildi.

Shu munosabat bilan oʻtkazilgan tadbirda taʼkidlanganidek, Ijtimoiy himoya milliy agentligi yetim va ota-ona qaramogʻidan mahrum boʻlgan bolalarni oila muhitida tarbiyalashga alohida eʼtibor qaratmoqda. Bu yoʻnalishdagi ishlar natijasida 2024–2025 yillar davomida Taxiatosh tumanidagi bolalar uyida tarbiyalanayotgan 39 nafar boladan 29 nafari ota-onasi yoki yaqin qarindoshlari bagʻriga qaytarildi. Bu jarayonda manzilli ishlash, oilalar bilan psixologik va moddiy koʻmak koʻrsatish muhim oʻrin tutdi.

Qolgan 10 nafar bola esa oilaviy muhitga yaqin sharoit yaratilgan, har bir bolaning shaxsiy rivojlanishi va tarbiyasi uchun qulay imkoniyatlarga ega boʻlgan Kichik hajmli bolalar uyiga joylashtirildi. Bu yerda bolalar nafaqat taʼlim va tarbiya oladi, balki turli toʻgaraklar, sport mashgʻulotlari va madaniy tadbirlarda faol ishtirok etishadi.

Mazkur tashabbus Oʻzbekistonda yetim va ota-ona qaramogʻidan mahrum boʻlgan bolalar hayotini yaxshilash, ularning ijtimoiy moslashuvini taʼminlash hamda har bir bolaning baxtli kelajagini yaratish yoʻlidagi muhim qadamlardan biri hisoblanadi. Ijtimoiy himoya milliy agentligi kelgusida ham bolalarni oila muhitiga qaytarish va ular uchun munosib shart-sharoit yaratish ishlarini izchil davom ettirishni rejalashtirmoqda.