Osiyo Taraqqiyot banki Oʻzbekistondagi yoʻl qurilishi uchun 233 mln dollar kredit ajratdi

Osiyo Taraqqiyot banki matbuot xizmatining xabar berishicha, Osiyo Taraqqiyot banki Markaziy Osiyo mintaqaviy iqtisodiy hamkorlik tashkiloti (MOMIH)-2 koridorining asosiy qismini modernizatsiya qilish loyihasini tasdiqladi.

Loyiha doirasida A-380 yoʻlining qariyb 87 km yangilanadi, jumladan Toʻrtkoʻl — Ellikqalʼa — Beruniy yangi aylanma yoʻli quriladi. Intellektual transport tizimlari joriy etilib, yuk mashinalari vaznini nazorat qilish, elektromobillarni quvvatlantirish stansiyalari boʻlgan dam olish joylari yaratiladi.

— Investitsiyalar Oʻzbekistonning mintaqaviy tranzit markazi sifatidagi rolini mustahkamlab, Qoraqalpogʻistonda inklyuziv iqtisodiy oʻsishni qoʻllab-quvvatlaydi. Iqlimga chidamli infratuzilma va intellektual transport tizimlarini joriy etish uzoq muddatli barqarorlikni taʼminlab, odamlar va biznes uchun sayohatni xavfsizroq va samaraliroq qiladi, — deydi OTBning Oʻzbekistondagi vakolatxonasi direktori Kanokpan Lao-Araya.

Xabarda maʼlum qilinishicha, loyihaning umumiy qiymati qariyb 294 mln dollar boʻlib, shundan OTB hissasi 233,1 mln dollarni tashkil qiladi.