Oʻzbekiston prezidentining AQShga qilgan tashrifi yakunlandi

Prezident AQShga tashrifi chogʻida Bosh Assambleyaning umumsiyosiy munozaralarda soʻzga chiqib, BMTning eng dolzarb global muammolarni hal etish uchun asosiy platforma sifatidagi oʻrniga, shuningdek, Yangi Oʻzbekistonda amalga oshirilayotgan ortga qaytmas islohotlarga alohida toʻxtalib oʻtdi.

Oʻzbekiston yetakchisi xalqaro va mintaqaviy ahamiyatga molik eng dolzarb masalalarni hal etish, tinchlik va barqaror taraqqiyotni taʼminlashga qaratilgan qator taklif va tashabbuslarni ilgari surdi.

Oʻzbekiston rahbarining AQSh Prezidenti Donald Tramp bilan uchrashuvi tashrifning markaziy voqeasi boʻldi. Davlat rahbarlari Oʻzbekiston-AQSh strategik sheriklik munosabatlarini yanada rivojlantirish va amaliy hamkorlikni kengaytirishga kelishib oldilar.

Shavkat Mirziyoyev, shuningdek, BMT Bosh kotibi A.Guterrish, Koreya Respublikasi Prezidenti Li Chje Myon, Iordaniya Podshohi Abdulla II ibn al-Husayn, Chexiya Respublikasi Prezidenti Petr Pavel, Albaniya Prezidenti Bayram Begay, shuningdek, XVF boshqaruvchi direktori Kristalina Georgiyeva, Jahon banki guruhi prezidenti Ajay Banga va Jahon savdo tashkiloti bosh direktori Ngozi Okondjo-Iveala bilan ham muzokaralar oʻtkazdi.

Oʻzbekiston Prezidenti AQSh Prezidentining Janubiy va Markaziy Osiyo boʻyicha maxsus vakili Serjio Gorni, AQSh Kongressidagi "Oʻzbekiston bilan hamkorlik boʻyicha kokus" raisi, kongressmen Trent Kellini qabul qildi.

Tashrifning ishbilarmonlik dasturi ham sermazmun boʻldi. Oʻzbekiston yetakchisi AQSh ishbilarmonlari ishtirokida davra suhbati, shuningdek, qator yetakchi transmilliy kompaniyalar, korporatsiyalar, investitsiya fondlari va moliyaviy institutlar - "Traxys", "FLSmidth", "McKinsey", "Go Green Partners", Kolorado geologiya maktabi, "BlackRock", "Boeing Global", "Franklin Templeton", "Citigroup", "Air Products", "BNY", "Jefferies", "NASDAQ", "Oppenheimer", "Air Products" va boshqa koʻplab kompaniyalar rahbarlari bilan muzokaralar oʻtkazdi.

Uchrashuv va muzokaralar natijasida oʻrta muddatli loyihalar dasturi shakllantirildi. Oʻzbekiston Respublikasi Prezidenti va AQSh Prezidentining maxsus vakili Serjio Gor huzurida muhim minerallar, fuqaro aviatsiyasi, kimyo sanoati, energetika va boshqa ustuvor sohalarda imzolangan ikki tomonlama savdo shartnomalari va investitsiya bitimlarini almashish marosimi boʻlib oʻtdi.

Amerika Qoʻshma Shtatlariga tashrifi yakunida davlatimiz rahbari, anʼanaga koʻra, AQShda ishlayotgan va yashayotgan bir guruh vatandoshlarimiz, shuningdek, Amerikaning yetakchi universitetlarida tahsil olayotgan "El-yurt umidi" jamgʻarmasi stipendiatlari bilan uchrashdi.

Tashrif tadbirlari yakunlangach, Prezident Shavkat Mirziyoyev Toshkent shahriga joʻnab ketdi.