Ozarbayjon Isroilning armanlar genotsidini tan olganidan norozi

Ozarbayjon 29-iyun kuni Isroilning Birinchi jahon urushi davridagi armanlar qirg‘inini genotsid deb tan olish haqidagi qarorini qoraladi. Isroilning bu qadami Turkiyaga nisbatan tanbeh sifatida baholanmoqda.

Ozarbayjon va Isroil ittifoqchi bo‘lsa-da, Bokuning eng yaqin tashqi hamkori Turkiya hisoblanadi. Kavkaz davlati Isroilning mazkur harakati ikki tomonlama munosabatlarga putur yetkazishi mumkinligiga ishora qildi.

Isroilning bu e’tirofi “jiddiy xavotir” uyg‘otmoqda, deyiladi Ozarbayjon Tashqi ishlar vazirligi bayonotida.

Arman genotsidi

Armaniston uzoq vaqtdan beri 1915–1917-yillarda – Usmonli imperiyasi davrida sodir etilgan ommaviy qotilliklar genotsidga teng ekanligi va bunda 1,5 million kishi halok bo‘lganini xalqaro hamjamiyat tomonidan tan olinishiga harakat qilib keladi.

Turkiya genotsid ayblovini qat’iy rad etib, Birinchi jahon urushi oqibatida armanlar ham, turklar ham o‘lganini ta’kidlaydi. Turkiya hisobicha, halok bo‘lganlar sonini yuz minglar atrofida.

AQSH, Fransiya va Germaniya kabi yigirmadan ortiq davlat bu qotilliklarni genotsid sifatida tan oladi.

“Bunday harakatlar yarashuvga yoki o‘zaro hamjihatlikka xizmat qilmaydi”, — deyiladi Ozarbayjonning Isroil qaroriga munosabatida.

Ozarbayjon va Isroil mudofaa hamda xavfsizlik sohasida keng miqyosli hamkorlikka ega.

Turkiya va Isroil 

Isroilning oldinma-ketin kelgan hukumatlari arman genotsidini rasman tan olishdan chekinib kelgan. Chunki bir vaqtlar Isroilning mintaqadagi eng yaqin strategik hamkorlaridan biri Turkiya edi.

Ammo G‘azoda urush boshlanganidan beri Turkiya muntazam ravishda Isroilni Falastin hududida genotsid sodir etishda ayblab kelmoqda, Isroil esa ayblovni inkor etadi.

Qorabog‘ mojarosining yumshashi

Ozarbayjon va Armaniston o‘ttiz yil davomida arman ayirmachilari tomonidan boshqarilgan Ozarbayjon eksklavi – Qorabog‘ maqomi yuzasidan o‘nlab yillar davomida mojaro ichida bo‘lgan.

Endilikda ikki qo‘shni keskinlikni yumshatish va keng qamrovli tinchlik bitimini yakunlash sari qadamlar tashlamoqda.