JSST ogohlantirgan yoʻtal siroplari Oʻzbekistonda roʻyxatdan oʻtkazilmagan

JSST maʼlumotlariga koʻra, Sresan Pharmaceutical, Rednex Pharmaceuticals va Shape Pharma kompaniyalari tomonidan ishlab chiqarilgan “COLDRIF”, “Respifresh TR” va “ReLife” nomli siroplarning ayrim seriyalarida dietilenglikol (DEG) moddasi aniqlangan. Mazkur modda organizm uchun zaharli boʻlib, Hindistonning ayrim hududlarida bolalar oʻlimi holatlariga sabab boʻlgan.

Oʻzbekiston Sogʻliqni saqlash vazirligi huzuridagi Farmatsevtika mahsulotlari xavfsizligi markazi bu holat yuzasidan rasmiy izoh berdi.

Markaz maʼlumotida taʼkidlanishicha, mazkur kompaniyalar tomonidan ishlab chiqarilgan dori vositalari, jumladan yuqorida tilga olingan siroplar, Oʻzbekistonda davlat roʻyxatidan oʻtkazilmagan.

Shuningdek, mamlakatga kirib kelayotgan barcha dori vositalari akkreditatsiyadan oʻtgan sinov laboratoriyalarida tekshiriladi va faqat ijobiy xulosa olinganidan soʻnggina sertifikatlanib, sotuvga chiqarilishi mumkin. Sertifikatsiz dori vositalarining bojxona hududidan olib chiqilishi va aylanishiga yoʻl qoʻyilmaydi.

Maʼlumot uchun, 2024 yil 8 iyulda qabul qilingan buyruqqa asosan, Oʻzbekistonga import qilinayotgan sirop shaklidagi preparatlarda etilenglikol va dietilenglikol moddalari mavjudligini majburiy tekshirish amaliyoti joriy etilgan. Bu orqali dori vositalari xavfsizligini taʼminlash hamda aholi salomatligiga tahdid solishi mumkin boʻlgan holatlarni oldini olish mexanizmi yoʻlga qoʻyilgan.