Ebola Yevropada: Fransiyada ilk kasallik holati tasdiqlandi

Kongo Demokratik Respublikasidagi gumanitar missiyadan Fransiyaga qaytgan shifokorning Ebola virusiga chalingani tasdiqlandi, deb xabar qildi davlat Sog‘liqni saqlash vazirligi.

Bu Markaziy Afrikada avj olgan hozirgi epidemiya boshlanganidan beri Yevropa hududida qayd etilgan birinchi holatdir.

Mahalliy yuqish xavfini cheklash maqsadida Fransiya hukumati bemor bilan muloqotda bo‘lgan har bir shaxsni aniqlash uchun epidemiologik surishtiruv boshladi.

“Mintaqaviy sog‘liqni saqlash agentligi bu odamlarga zudlik bilan bog‘lanadi, ular 21 kun davomida yakkalanib, qat’iy nazorat ostida bo‘ladi", — deya qo‘shimcha qildi vazirlik.

Shuningdek, aholi uchun xavf darajasi “juda past” ekanini ta’kidlandi.

Kongodagi vaziyat

May oyi o‘rtalarida kasallik avj olgani rasman e’lon qilingandi. Shundan beri 1000 dan ortiq holat tasdiqlanib, kamida 260 kishi vafot etdi.

Kasallikni Ebola virusining kam uchraydigan Bundibugyo shtammi keltirib chiqaradi va hozirda unga qarshi tasdiqlangan vaksina yoki davo mavjud emas.

Sog‘liqni saqlash idoralari epidemiyaning o‘chog‘i bo‘lgan Ituri provinsiyasida virus tarqalishini jilovlashga urinmoqda. Bu yerda qurolli to‘qnashuvlar bilan bog‘liq harakat tibbiy guruhlar ishini qiyinlashtirmoqda.

Jahon sog‘liqni saqlash tashkiloti inqiroz butun mintaqaga tarqalishi mumkinligidan xavotir bildirdi, chunki qo‘shni Ugandada allaqachon bir nechta holat qayd etilgan.