Oʻzbekiston hukumatining yuzdan ortiq vakili tadbirkorlik bilan shugʻullanayotgani maʼlum boʻldi

Aytilishicha, Transport vazirligining 50 ta boshqaruv xodimi 55 ta tadbirkorlik subʼektida, Maktabgacha va maktab taʼlimi vazirligining 37 ta boshqaruv xodimi 39 ta tadbirkorlik subʼektida hamda Madaniyat vazirligining 20 ta boshqaruv xodimi 22 ta tadbirkorlik subʼektida taʼsischilik asosida faoliyat yuritib kelgan.

"Yuqoridagi holatlarini bartaraf etish boʻyicha mazkur vazirliklarga agentlik tomonidan kiritilgan taqdimnomalar ushbu vazirliklar tomonidan tanqidiy muhokama qilindi va tadbirkorlik subʼektlarida taʼsischilik qilayotgan xodimlarga nisbatan ogohlantirish xatlari berilib, qayd etilgan qonunbuzilishi holatlari bartaraf etilmoqda", deyiladi xabarda.

Eslatib oʻtamiz, avvalroq Qurilish va uy-joy kommunal xoʻjaligi, Suv xoʻjaligi hamda Qishloq xoʻjaligi vazirliklaridagi 398 nafar boshqaruv xodimi tadbirkorlik bilan shugʻullanishi aniqlangan edi. 

Maʼlumot uchun, Oʻzbekiston Respublikasining "Tadbirkorlik faoliyati erkinligining kafolatlari toʻgʻrisida"gi Qonunining 4-moddasiga asosan davlat organlari (qonun hujjatlarida nazarda tutilgan hollar bundan mustasno), ularning mansabdor shaxslari, shuningdek tadbirkorlik faoliyati bilan shugʻullanishi qonunchilikda man etilgan boshqa shaxslar tadbirkorlik faoliyati subʼektlari boʻlishi mumkin emasligi belgilangan. 

Shu bilan birga, Oʻzbekiston Respublikasining "Davlat fuqarolik xizmati toʻgʻrisida"gi Qonunining 13-moddasida davlat fuqarolik xizmatchisi tadbirkorlik faoliyati bilan shugʻullanishga, tadbirkorlik faoliyati subʼektlarini tashkil etishga, ularning muassisi (ishtirokchisi) boʻlishga, tadbirkorlik faoliyati subʼektida tashkiliy-boshqaruv, maʼmuriy-xoʻjalik vazifalarini bajarishga davlat fuqarolik xizmatini oʻtash bilan bogʻliq cheklovlar oʻrnatilgan.