Oʻzbekiston va Pokiston strategik hamkorlikni yangi bosqichga olib chiqdi

Prezident matbuot xizmati xabariga koʻra, uchrashuvda ikki davlat oʻrtasidagi strategik sheriklik va koʻp qirrali hamkorlikni yanada kengaytirishning amaliy jihatlari muhokama qilindi.

Qayd etilishicha, 2025 yil yakunlariga koʻra oʻzaro savdo hajmi qariyb 500 million dollarga yetgan. Bugungi kunda Oʻzbekistonda Pokiston kapitali ishtirokidagi 230 ga yaqin korxona faoliyat yuritmoqda. Ikki mamlakat oʻrtasida aviaqatnovlar soni oshgan, banklararo korrespondentlik munosabatlari izchil mustahkamlanmoqda.

Tomonlar tashrif arafasida oʻtkazilgan siyosiy maslahatlashuvlar va Hukumatlararo komissiya yigʻilishining samarali natijalarini yuqori baholadi. Shuningdek, tashqi ishlar vazirliklari Muvofiqlashtiruvchi qoʻmitasining birinchi yigʻilishini yaqin kunlarda Toshkentda oʻtkazish zarurligi taʼkidlandi.

Iqtisodiy hamkorlikni kengaytirish rejalari

Ishbilarmon doiralar oʻrtasida uzoq muddatli hamkorlikni yoʻlga qoʻyish maqsadida Oʻzbekiston—Pokiston Ishbilarmonlar kengashini tashkil etish toʻgʻrisida kelishuvga erishildi.

Yaqin istiqbolda oʻzaro tovar ayirboshlash hajmini 2 milliard dollarga yetkazish vazifasi qoʻyildi. Shu doirada Imtiyozli savdo bitimiga kiritilgan mahsulotlar turini kengaytirish, Oʻzbekiston qishloq xoʻjaligi mahsulotlari uchun fitosanitariya ruxsatnomalari roʻyxatini oshirish hamda Lahor va Karachidagi Oʻzbekiston savdo uylari faoliyatidan keng foydalanishga kelishib olindi.

Tashrifga tayyorgarlik jarayonida qishloq xoʻjaligi, elektrotexnika, geologiya, farmatsevtika, yengil sanoat, oziq-ovqat mahsulotlarini qayta ishlash kabi sohalarda 3,5 milliard dollarlik loyihalar portfeli shakllantirildi.

Transport, hududlararo va madaniy aloqalar

Transport va logistika sohasida hamkorlikni rivojlantirishga alohida eʼtibor qaratildi. Transafgʻon temir yoʻli loyihasini jadallashtirish hamda «Pokiston—Xitoy—Qirgʻiziston—Oʻzbekiston» transport yoʻlagini rivojlantirish muhimligi taʼkidlandi.

Hududlar oʻrtasidagi hamkorlik iqtisodiy aloqalarni rivojlantirishning asosiy drayverlaridan biri sifatida belgilandi. Shu munosabat bilan Oʻzbekiston—Pokiston hududlararo forumini tashkil etish va uning birinchi yigʻilishini joriy yilda Xorazm viloyatida oʻtkazish taklif etildi.

Shuningdek, Shavkat Mirziyoyev Boburiylar merosini targʻib qilish maqsadida Lahor shahrida qoʻshma madaniyat markazini tashkil etish tashabbusini ilgari surdi.

Imzolangan hujjatlar

Uchrashuv yakunida davlat rahbarlari Qoʻshma deklaratsiyani imzoladi. Shuningdek, ular ishtirokida keng qamrovli hujjatlar toʻplami almashildi.

Jumladan, Oʻzbekiston—Pokiston Ekspertlar kengashini tuzish, port xizmatlari, konchilik va geologiya, qishloq xoʻjaligi, farmatsevtika mahsulotlarini nazorat qilish, toʻqimachilik va tikuvchilik sanoati, raqamli texnologiyalar, madaniyat va sport, ekologiya, radiatsiya va yadroviy xavfsizlik hamda tabiiy ofatlarning oldini olish sohalarida hamkorlik toʻgʻrisidagi bitimlar imzolandi.

Bundan tashqari, korrupsiyaga qarshi kurashish, giyohvand moddalarning noqonuniy aylanmasiga qarshi kurashish, mahbuslarni topshirish, Buyuk Boburiylar sulolasi merosini saqlash va targʻib qilish, hududiy va taʼlim muassasalari oʻrtasidagi hamkorlikka oid qator kelishuvlar qabul qilindi.

Shuningdek, favqulodda vaziyatlarni boshqarish, mudofaa vazirliklari oʻrtasida yoʻl xaritasi, Imtiyozli savdo bitimiga yangi tovarlar kiritish hamda Oʻzbekistondan Pokistonga olma, anjir, limon va achchiq qalampir eksporti uchun fitosanitariya talablari toʻgʻrisidagi protokollar imzolandi.