O‘zbekistonda ayrim talabalarning yotoqxona yoki bir yillik ijara xarajatlari vаucher orqali qoplanadi

O‘zbekistonda Ijtimoiy reyestrga kiritilgan oilalar farzandlariga bir qator ta’lim va ijtimoiy xizmatlar uchun vаucher ajratiladi. U orqali bog‘cha puli, o‘quv markazi to‘lovi, yo‘l kira, shuningdek, oliygohda tahsil olayotgan farzandlarning yotoqxona va ijara uy xarajatlari qoplanadi.

Bu tartib 2027-yil 1-yanvardan boshlab joriy etiladi. Tegishli normalar Prezidentning 11-sentabrda imzolangan PF-193-son farmonida belgilangan.
Vаucherlar mahalla yettiligi tomonidan tasdiqlanadigan individual reja asosida yoki bolaning qonuniy vakili murojaatiga ko‘ra shakllantiriladi.

Bog‘cha puli va qo‘shimcha ta’lim xarajatlari

Vаucher asosida davlat va nodavlat maktabgacha ta’lim tashkilotlarida bola ta’minoti uchun belgilangan to‘lovlarni qoplash imkoniyati yaratiladi. Vаucherning amal qilish muddati 12 oy etib belgilangan.

Bunda oila Ijtimoiy reyestrdan chiqarilgan taqdirda ham vаucherning amal qilish muddati tugaguniga qadar undan foydalanish huquqi saqlanib qoladi.

Vаucher orqali maktabgacha ta’lim tashkilotiga u joylashgan hududda bola ta’minoti uchun belgilangan to‘lov miqdorida mablag‘ ajratiladi. Ushbu xarajatlar davlat budjeti mablag‘lari hisobidan maktabgacha ta’lim xizmatini ko‘rsatgan tashkilotga qoplab beriladi.

Shuningdek, Ijtimoiy reyestrga kiritilgan oilalarning umumiy o‘rta ta’lim muassasalarida o‘qiyotgan farzandlarini qo‘shimcha ta’limga jalb qilish va ularning borib-kelish yo‘l kira xarajatlarini qoplash mexanizmi ham joriy etiladi. Bu yo‘nalish uchun Maktabgacha va maktab ta’limi vazirligi mas’ul etib belgilangan.

Talabalar uchun

Yangi tartib Ijtimoiy reyestrga kiritilgan oilalarning kunduzgi ta’lim shaklida tahsil olayotgan talaba farzandlariga ham taalluqli.

Ularga davlat OTMlaridagi talabalar turar joylaridan foydalanish, davlat-xususiy sheriklik asosida tashkil etilgan talabalar turar joylarida yashash hamda xususiy uy-joylarni ijaraga olib yashash xarajatlari qoplab beriladi.

Bu holatda ham vаucher 12 oy davomida amal qiladi. Oila Ijtimoiy reyestrdan chiqarilgan taqdirda, voucher amal qiladigan muddat davomida undan foydalanish huquqi saqlanadi.

Talabalar turar joylarida yashash xarajatlari talaba nomiga ochilgan ijtimoiy kartaga davlat budjeti mablag‘lari hisobidan qoplab beriladi. Ushbu yo‘nalish uchun Oliy ta’lim, fan va innovatsiyalar vazirligi mas’ul hisoblanadi.