Oʻzbekistonda qishloq xoʻjaligi 76 mlrd soʻmdan ziyod zararga kirdi

Qayd etilishicha, joriy yilning avgust oyida jami 195 ta holatda qishloq xoʻjaligiga moʻljallangan 274 gektar yer maydonida yerga oid qonunbuzarlik holatlari qayd etilgan. Shundan sugʻoriladigan 127,0 gektar yerlarda, 83,0 gektar lalmi yerlarda, 2,4 gektar boʻz yerlarda, 62,0 gektar yaylov yerlarda qonunbuzarlik holatlari aniqlangan.

Buning oqibatida yerlarning oʻzboshimchalik bilan qishloq xoʻjaligi muomalasidan chiqarilishiga sabab boʻlgan. Ushbu holatlarda qonunbuzarlarga nisbatan jami 76 milliard 916 million soʻm miqdorida qishloq xoʻjaligiga yetkazilgan zarar hisoblangan. 

Eng koʻp qonunbuzarlik holatlari viloyatlar kesimida olib qaralganda Andijon viloyati (30 ta holatda), Qashqadaryo (43 ta holatda), Namangan (41 ta holatda), Samarqand (29 ta holatda), Surxondaryo viloyatlarida (19 ta holatda) aniqlangan. 

"Aniqlangan yer qonunbuzarlik holatlaridan 109 tasi prokuratura organlariga, 47 tasi esa IIV hududiy boʻlinmalariga chora koʻrish uchun, 42 ta holatda boshqa tashkilotlarga, 8 ta holatda yerdan foydalanuvchilarga ogohlantirish xatlari yuborilgan", deyiladi xabarda.

Eslatib oʻtamiz, jriy yilning 11 sentabr kuni Prezident Shavkat Mirziyoyev raisligida oʻtgan videoselektor yigʻilishida bir yil davomida yana 50 ming gektar yerni 100 mingta kambagʻal oilaga boʻlib berish rejalashtirilganini maʼlum qilingan edi.