Rossiya, Tojikiston va Qirgʻizistondan narkotik moddalarni tashiganlar qoʻlga olindi

Aytilishicha, 1995 yilda tugʻilgan Tojikiston Respublikasi fuqarosi Samarqand viloyatining Urgut tumanida yashovchi, 1992 va 2005 yillarda tugʻilgan 2 nafar shaxs bilan oʻzaro til biriktirib, Tojikistondan Oʻzbekiston hududiga 20 kg 749 gr "opiy" moddasini olib oʻtishga uringan. Ammo ular Davlat xavfsizlik xizmatining Chegara qoʻshinlari harbiy xizmatchilari tomonidan ashyoviy dalillar bilan qoʻlga olingan. 

Boshqa holatda esa Rossiya Federatsiyasidan Qozogʻiston Respublikasi orqali Oʻzbekistonga kirishga uringan Buxoro viloyatining Peshku tumanida yashovchi shaxs boshqaruvidagi "LADA Largus" rusumli mashina DXX Chegara qoʻshinlari harbiy xizmatchilari tomonidan tekshirilgan. Oqibatda mashinadan Moskva shahridan olib kelinayotgan 2 dona ovoz chiqarish kolonkasi ichiga yashirib qoʻyilgan 18 kg 97 gr "Mefedron" sintetik narkotik moddasi borligi aniqlanib, tegishli tartibda rasmiylashtirib olingan. Tergovga qadar tekshiruv davomida u oʻzining shaxsiy avtomashinasida "Oʻzbekiston-Rossiya-Oʻzbekiston” yoʻnalishida fuqarolarni tashish bilan shugʻullanishi maʼlum boʻlgan. 

Shuningdek, DXXning Fargʻona viloyati boʻyicha boshqarmasi xodimlari tomonidan bojxona organlari bilan hamkorlikda oʻtkazilgan tezkor tadbirda Fargʻona tumanida istiqomat qiluvchi muqaddam giyohvandlik vositalari savdosi bilan bogʻliq jinoyati uchun sudlangan shaxs va muqaddam oʻgʻrilik jinoyati uchun sudlangan fuqaro oʻzaro til biriktirib, Qirgʻiziston Respublikasidan 56 000 dona "Regapen" kuchli taʼsir qiluvchi dori vositalarini olib kirgani aniqlangan. Ularning yashash xonadoni koʻzdan kechirilganda qoʻshimcha 6780 dona "Zardeks" kuchli taʼsir qiluvchi dori vositalari borligi ham maʼlum boʻlgan. 

Bundan tashqari, DXXning Sirdaryo viloyati boʻyicha boshqarmasi xodimlari va bojxona organlari bilan hamkorlikda oʻtkazilgan tezkor tadbir davomida Samarqand viloyatining Bulungʻur tumanida doimiy yashovchi muqaddam sudlangan fuqaroning "Nexia" rusumli avtotransport vositasi va uning Yakkasaroy tumanidagi ijaraga olgan xonadoni koʻzdan kechirilgan. Oqibatda fuqaroga tegishli boʻlgan 43 666 dona "Regapen" kuchli taʼsir qiluvchi dori vositalari borligi aniqlanib, protsessual tartibda rasmiylashtirib olingan. Ushbu dori vositalari ham Qirgʻiziston Respublikasidan kontrabanda yoʻli bilan olib kelingan. 

Hozirda mazkur shaxslarga nisbatan jinoyat ishlari qoʻzgʻatilib, tergov harakatlari olib borilmoqda.