Samarqandda koreyalik shifokorlar ishtirokida tibbiy aksiya oʻtkazildi

Jumladan, uning doirasida viloyat koʻp tarmoqli tibbiyot markazida dastlab otolaringologiya boʻyicha mahorat darsi tashkil etildi. Soʻngra 62 nafar bemorga tegishli tekshiruvlar yakunida zarur maslahat va tavsiyalar berildi.

Fizioterapiya boʻlimida 26 nafar, jarrohlik boʻlimida esa 24 nafar bemor qabul qilindi.

Viloyat bolalar koʻp tarmoqli tibbiyot markazida 150 nafardan ortiq aholi vakili koʻrikdan oʻtkazilib, ularga dori-darmon va sovgʻalar tarqatildi.

Respublika ixtisoslashtirilgan travmatologiya va ortopediya ilmiy-amaliy tibbiyot markazi viloyat filialida esa koreyalik mutaxassislar ikkita jarrohlik amaliyotida qatnashdi va 20 nafardan ziyod bemorga tibbiy yordam koʻrsatildi.

Tadbir davomida mehmonlar bilan oʻzaro tajriba almashildi. Bemorlar koʻrsatilgan tibbiy yordam uchun koreyalik shifokorlarga alohida minnatdorlik bildirdi.

Tashrif yakunida tomonlar oʻrtasida hamkorlikni davom ettirish boʻyicha memorandum imzolandi.