Sea Breeze Uzbekistan hujjatlari ekologik ekspertizaga taqdim etilmagan

Bu haqda markaz direktori Gʻayrat Muxamedov 23 yanvar kuni Boʻstonliq tumanida oʻtgan jamoatchilik eshituvida maʼlum qildi.

Uning aytishicha, Vazirlar Mahkamasining 541-sonli qaroriga muvofiq, ekologik ekspertiza oʻtkazishdan oldin jamoatchilik eshituvi tashkil qilinishi shart. Faqat ushbu jarayon yakunlangach, loyiha hujjatlari Davlat ekologik ekspertizasi markaziga topshiriladi.

«Jamoatchilik eshituvidan soʻng Sea Breeze Uzbekistan rahbariyati tomonidan bayonnoma ilova qilingan holda ekologik loyiha bizga taqdim etilishi kerak. Shundan keyin hujjatlarni oʻrganib, ekologik ekspertiza oʻtkazishni boshlaymiz. Loyiha yirik boʻlgani sababli jarayonga xorijiy mutaxassislarni ham jalb qilish rejalashtirilgan. Ekspertiza taxminan 2–3 oy davom etadi», — dedi Gʻayrat Muxamedov.

Markaz direktori, shuningdek, Sea Breeze Uzbekistan loyihasining ekologik hujjatlari Oʻzbekiston Fanlar akademiyasi huzuridagi Botanika instituti va Zoologiya instituti olimlari tomonidan ham oʻrganilishini taʼkidladi. Ekologik ekspertiza xulosalari markazning rasmiy veb-sayti va ijtimoiy tarmoqlarda jamoatchilikka eʼlon qilinadi.

«Agar oʻsimlik yoki hayvonot dunyosiga zarar yetkazilgani aniqlansa, kompensatsiya toʻlovlari Sea Breeze Uzbekistan tomonidan toʻliq qoplanadi va zarar oʻrniga tiklanadi», — dedi u.

Ekologiya va iqlim oʻzgarishi milliy qoʻmitasi huzuridagi jamoatchilik kengashi raisi Natalya Shivaldova ham Zoologiya va Botanika institutlari vakillari loyihaning atrof-muhitga taʼsirini baholash jarayoniga jalb etilishini bildirdi.

«Ekologik ekspertizaga oid barcha materiallar jamoatchilikka ochiq taqdim etiladi. Hozircha hayvonot va oʻsimlik dunyosiga zarar yetkazish rejalashtirilmagan», — dedi u.