Toshkentdagi «turizm koʻchalari» uchun alohida avtobuslar qatnovi yoʻlga qoʻyiladi

Hujjatda, jumladan, tungi jamoat transportlarining yoʻlkira haqi hamda ularning qulayliklariga aniqlik kiritilgan.

Qayd etilishcha, bunda yoʻlkira haqi Toshkent shahrining jamoat transporti yoʻnalishlari bilan bir xil etib belgilanadi hamda zamonaviy talablarga javob beradigan, konditsionerli, Wi-fi, videokuzatuv tizimiga ega, shuningdek imkoniyati cheklangan shaxslar uchun moslashtirilgan avtobuslar xizmati yoʻlga qoʻyiladi. 

Eslatib oʻtamiz, bir muddat oldin «Gazeta.uz» nashri xalq deputatlari shahar kengashining yigʻilishida poytaxt Transport va yoʻl-transport infratuzilmasini rivojlantirish bosh boshqarmasi boshligʻi oʻrinbosari O.Norboʻtayevning turizm koʻchalari orqali harakatlanuvchi tungi avtobus yoʻnalishlari tarmogʻi yuzasidan maʼlumot bergani haqida yozgandi.

Unda, xususan, Norboʻtayev tungi soat 22:00 dan ertalab 06:00 gacha harakatlanadigan avtobuslar Toshkent shahridagi aeroportlar, temiryoʻl vokzallari, metro bekatlari, tungi turizm koʻchalari, savdo va koʻngilochar markazlar, yirik dehqon bozorlari, talabalar yotoqxonasi va shifoxonalar orqali harakatlanishini aytgan. Bunda umumiy hisobda 15 ta yoʻnalish ikki bosqichda, oraliq intervali dastlab yarim soatni tashkil etgan holda tashkil etiladi.

Norboʻtayevning taʼkidlashicha, Toshkent shahri hokimiyatidan avtobuslarni alohida qizil rangga boʻyash taklifi boʻlgan. Avtobus yoʻnalishlari raqamlari ham T1, T2, yaʼni «tungi avtobus» sifatida belgilanadi.

«15 ta yoʻnalishda 54 ta avtobus harakatlanadi. Oʻsha yoʻnalishdagi tushumni hisoblamasak, oʻrtacha 33 milliard soʻm mahalliy byudjetga yuklama tushadi», – dedi Olloyor Norboʻtayev.