Oʻzbekistonda minimal pensiya yoshini oshirish rejalashtirilmoqda

Taklifga koʻra:

erkaklar uchun — 60 yoshdan 63 yoshgacha; 

ayollar uchun — 55 yoshdan 58 yoshgacha.

Oʻzgarish bosqichma-bosqich amalga oshiriladi — har yili yarim yildan qoʻshib boriladi.

Otajonovning taʼkidlashicha, jahonning koʻplab mamlakatlarida pensiya yoshi 65 yoshdan yuqori. Oʻzbekistonda esa soʻnggi 32 yil davomida pensiya yoshi oshirilmagan.

Hozirda mamlakatda oʻrtacha umr koʻrish 75 yoshga yetgan. Agar 20 yil oldin pensionerlar oʻrtacha 8–9 yil umr koʻrgan boʻlsa, bugungi kunda bu koʻrsatkich erkaklarda 12,5 yilga, ayollarda esa 20 yilga yetgan.

Shu bilan birga, pensiya yoshini har yili yarim yil emas, balki 3 oydan oshirish variant ham koʻrib chiqilishi mumkin. Bu holda islohot 12 yil davomida amalga oshiriladi.

Otajonovning taʼkidlashicha, hozircha yakuniy qaror qabul qilinmagan. Pensiya tizimini isloh qilish boʻyicha aholi takliflari bir oy mobaynida maxsus platforma orqali yigʻiladi. Keyin ular muhokama qilinadi va rasmiy loyiha jamoatchilikka taqdim etiladi.