Braziliyalik futbolchi Rodrigo uzoq muddatli jarohat oldi.

«Real Madrid» vingeri La Liganing 26-turida «Xetafe»ga qarshi uchrashuvda (0:1) zaxiradan oʻyinning 55-daqiqasida maydonga tushirilgan edi. Biroz vaqt oʻtib u ogʻriq his qilib maydonga yiqildi, ammo shunga qaramay uchrashuvni oxirigacha davom ettirdi.

Keyinchalik «Real Madrid» tibbiy shtabi oʻtkazgan tekshiruvlar natijasida Rodrigoning tizzasidagi xochsimon payi uzilgani maʼlum boʻldi. Afsuski, u kamida 6 oydan 10 oygacha boʻlgan muddat davomida maydonga qayta olmasligi aytilmoqda.

Katta ehtimol bilan u Braziliya terma jamoasiga jahon chempionatida yordam bera olmasligi mumkin. Eslatib oʻtamiz, guruh bosqichida Braziliya Marokash, Gaiti va Shotlandiya terma jamoalariga qarshi bahs olib boradi.

Futbolchiga sogʻliq tilab qolamiz va uning tez orada yana yashil maydonga qaytishini kutamiz.