Oʻzbekistonlik sobiq amaldorning oʻgʻli Dubayda 8 mln. dollarlik mulkka egalik qilishi maʼlum boʻldi

Oʻzbekiston hukumati tomonidan Rashid Qodirovning oʻgʻli Alisher Qodirovga nisbatan  JK 165-m. 2-qism a-bandi (takroran yoki xavfli retsidivist tomonidan tovlamachilik), 3-qism a-bandlari (juda koʻp miqdorda tovlamachilik) va 168-m. 3-qism a-bandi (koʻp miqdorda firibgarlik), 4-qism a-bandi (juda koʻp miqdorda firibgarlik) sodir etganlikda ayblanib xalqaro qidiruv eʼlon qilingan.

2018 yil 22 fevralda esa Oʻzbekistonning sobiq prokurori Rashiq Qodirov hibsga olingan edi.  Bu holat haqida Prezident Shavkat Mirziyoyev 2018 yilda Andijonga qilgan tashrifida shunday fikr bildirgan.

«Mana, Rashid Qodirov guruhi bilan qamoqda oʻtiribdi. Million-million dollarlarni qaytaryapti. 2-3 oydan keyin uning oʻzi televideniye orqali barchani qanday poraxoʻr qilganini aytib beradi. Har bir tuman prokuroridan 30-40 ming AQSh dollari olgan. Hozir u barchasini qaytaryapti. Birgina oʻgʻli milliarder. Boshqa tashkilotlar rahbarlari ham, MXX (hozirgi DXX)ning 5 sobiq oʻrinbosarlari ham qamoqda. Ularning hammasi oʻgʻri. Qanday boʻlmasin, men hammasini joyiga qoʻyaman.

Ularning hammasi Boltiqboʻyida uylar qurgan. Hatto Amir Temur bunaqa uylarda yashamagan. Bu kimning pullari – xalqniki. Shu boisdan ham prokuraturada 70 foiz xodim almashdi. Men hammani kechiraman, ammo oʻgʻri va xoinlarni kechirmayman. Mana shuni xalqim bilishi kerak», - degan edi Prezident.

«Davlat sirlari toʻgʻrisida»gi qonun talablariga muvofiq, Rashid Qodirovga nisbatan sud jarayoni yopiq tarzda oʻtkazilib, 6 oyga yaqin vaqt davom etgan. Sud tergovi jarayonida barcha sudlanuvchilarning koʻrsatmalari tekshirilgan, 200 ga yaqin guvohlarning koʻrsatuvlari tinglanib, ish boʻyicha oʻtkazilgan ekspertiza va xizmat tekshiruvlari xulosalari, shuningdek, jinoyat ishida toʻplangan dalillar, ularning qonuniyligi va asosliligi nuqtai nazaridan taftish qilingan.

Sobiq prokurorga sud hukmi bilan 10 yil ozodlikdan mahrum qilish va eng kam oylik ish haqining 500 baravari miqdorida jarima jazosi tayinlangan edi. Shuningdek, Rashid Qodirov 2014 yilda sobiq prezident Islom Karimovning qizi Gulnora Karimovaga nisbatan ayblov eʼlon qilinganda masʼul prokuror boʻlgan.

Maʼlumotlarga koʻra, Alisher Qodirovning Marina Plaza majmuasida 4 ta ofisi bor, ularning qiymati  1,9 million dollardan 2 million dollargacha hisoblanadi.