Rus siyosatchilarining tashabbuslarini qoʻllab-quvvatlashimiz kerak — Alisher Qodirov

Rossiyalik siyosatchi Leonid Slutskiy shu yilning 29 iyul kuni TASS (Rossiyaning eng yirik axborot agentliklaridan biri) tomonidan tashkil etilgan matbuot anjumanida Rossiyaga ishlashga kelgan muhojirlar uchun majburiy xulq-atvor qoidalari toʻplamini, yaʼni "Migrant kodeksi"ni shakllantirishni taklif qildi. 

"Yashirin migratsiya oqimlariga qarshi kurash tajribamizni umumlashtirib, LDPRda mamlakatimizning huquqiy maydonida yangi bir qadam tashlash va chetdan kelib Rossiyada halol mehnat qilmoqchi boʻlgan chet ellik mehnatkashlar uchun majburiy xulq-atvor qoidalarini oʻz ichiga oluvchi "Migrant Kodeksi"ni ishlab chiqish qarorini qabul qildik", deya taʼkidlagan u. 

Bundan tashqari, Leonid Slutskiy yuqoridagi hujjat Rossiya fuqarolarining istaklariga asoslangan partiyaviy qonunchilik tashabbuslariga tayanishini qoʻshimcha qilgan.

"Kodeksning mazmunini diasporalar(bir millat yoki etnik guruh vakillarining oʻz vatanidan tashqarida, boshqa mamlakatlarda yashab, oʻz madaniyatini, tili va anʼanalarini saqlab qolgan jamoalari), ishchi migrantlardan manfaatdor biznes, shuningdek, huquqni muhofaza qilish organlari va hukumat bilan muhokama qilishga tayyormiz", deydi Slutskiy . 

Oʻzbekiston Oliy Majlis Qonunchilik palatasi deputati, "Milliy tiklanish" demokratik partiyasi fraksiyasining rahbari Alisher Qodirov rus siyosatchilarining yuqorida taʼkidlangan tashabbuslarini qoʻllab-quvvatlashini bildirdi. Bu haqda u oʻzining ijtimoiy tarmoqlardagi sahifasida yozdi. 

"Yaqin kelajakda kutilayotgan beqarorlik, relokantlarni jiddiy ortishi ehtimollari fonida nafaqat biz, butun Markaziy Osiyo mintaqasini Rossiya bilan viza orqali kirish-chiqish qilish, ish izlab borayotganlarga talablar va nazoratni kuchaytirish haqidagi rus siyosatchilarining tashabbuslarini qoʻllab-quvvatlashimiz kerak deb oʻylayman", deydi Qodirov.

Shuningdek, u Oʻzbekistonda yashaydigan hamma oʻzbek tili, madaniyati va mahalliy qadriyatlarni bilishi va hurmat qilishi kerak deb hisoblashini, xorijga ish izlab borayotgan oʻzbekistonliklar ham mahalliy til, madaniyat, qonunlar va qiladigan ishini yaxshi bilishi zarurligini bildirgan.

 "Bu bilan haqini himoya qila olmaydigan, mahalliy ayirmakashlar tomonidan kamsitilishga rozi boʻlayotgan, eng yomoni, ixtiyoriy-majburiy, masʼuliyatsizlarcha hayotini sotib yuborib Oʻzbekiston uchun jiddiy ijtimoiy, siyosiy, iqtisodiy yuk yaratayotgan ayrim fuqarolarimizga ham yordam bergan boʻlamiz", deydi deputat. 

Maʼlumot uchun, "Muhojirlar kodeksi"da ishchi migrantlarning rus tilini bilishi, agar ularning oilasi Rossiyada yashasa, oilasini rus tiliga oʻrgatishi, Rossiya madaniyati va anʼanalariga hurmat bilan qarashi, shuningdek, jamoat joylarida xulq-atvor qoidalariga rioya qilishini talab etilgan. 

Bundan tashqari, chet elliklar rasmiy ravishda ishga joylashishi, soliq toʻlashi, ish ruxsatnomasini olishi, deportatsiya yoki badargʻa xavfining sugʻurtasiga ega boʻlishi, shuningdek, barmoq izi, genom boʻyicha roʻyxatga olish va ruhiy tekshiruvdan oʻtishi kerak.