Parij-2024: Kecha oʻzbekistonlik para sportchilar uchun omadsiz kun boʻldi

Para suzish boʻyicha Oʻzbekiston delegatsiyasi aʼzolari — Firdavsbek Musabekov, Muzaffar Tursunxoʻjayev hamda Dmitriy Xorlin erkaklar oʻrtasida (S13 klassi) 200 metrga kompleks usulda suzish boʻyicha oʻtkazilgan saralash bahslarida ishtirok etdi. Afsuski, ulardan birontasi ham finalga chiqa olmadi.

Para yengil atletika boʻyicha erkaklar oʻrtasida (T36 klassi) 400 metr masofaga yugurish bahslari ham boʻlib oʻtdi. Ushbu yoʻnalishda Oʻzbekiston terma jamoasi sharafini himoya qilgan sportchi Izzat Turgʻunov 1 daqiqa 04,31 soniya natija qayd etib, 7-oʻrinni egalladi. 

Para yengil atletika boʻyicha ayollar oʻrtasida (F56 klassi) nayza uloqtirish dasturida ishtirok etgan terma jamoaning yana bir aʼzosi Nataliya Semyonova final yoʻllanmasini qoʻlga kiritdi. Finalda u 16,96 metr natija koʻrsatib musobaqani 9-oʻrinda yakunladi. 

Ayollar oʻrtasida (S13 klass) 200 metr masofaga kompleks usulda suzish boʻyicha ishtirok etib, final yoʻllanmasini qoʻlga kiritgan Shoxsanam Toshpoʻlatovadan ham finalda omad yuz oʻgirdi. Shoxsanam Toshpoʻlatova finalda 2 daqiqa 27,55 soniya natija qayd etib, musobaqani 4-oʻrinda yakunladi. 

Oʻzbekiston terma jamoasi jami 14 ta medal bilan umumiy reytingda 10-oʻrinni egallab turibdi. Reytingda Xitoy terma jamoasi 115 ta medal bilan yaqqol peshqadamlik qilmoqda. Hozircha kuchli uchlikdan Buyuk Britaniya va AQSh terma jamoalari oʻrin olgan.