Париж-2024: Кеча ўзбекистонлик пара спортчилар учун омадсиз кун бўлди

Пара сузиш бўйича Ўзбекистон делегацияси аъзолари — Фирдавсбек Мусабеков, Музаффар Турсунхўжаев ҳамда Дмитрий Хорлин эркаклар ўртасида (S13 класси) 200 метрга комплекс усулда сузиш бўйича ўтказилган саралаш баҳсларида иштирок этди. Афсуски, улардан биронтаси ҳам финалга чиқа олмади.

Пара енгил атлетика бўйича эркаклар ўртасида (T36 класси) 400 метр масофага югуриш баҳслари ҳам бўлиб ўтди. Ушбу йўналишда Ўзбекистон терма жамоаси шарафини ҳимоя қилган спортчи Иззат Турғунов 1 дақиқа 04,31 сония натижа қайд этиб, 7-ўринни эгаллади. 

Пара енгил атлетика бўйича аёллар ўртасида (F56 класси) найза улоқтириш дастурида иштирок этган терма жамоанинг яна бир аъзоси Наталия Семёнова финал йўлланмасини қўлга киритди. Финалда у 16,96 метр натижа кўрсатиб мусобақани 9-ўринда якунлади. 

Аёллар ўртасида (S13 класс) 200 метр масофага комплекс усулда сузиш бўйича иштирок этиб, финал йўлланмасини қўлга киритган Шохсанам Тошпўлатовадан ҳам финалда омад юз ўгирди. Шохсанам Тошпўлатова финалда 2 дақиқа 27,55 сония натижа қайд этиб, мусобақани 4-ўринда якунлади. 

Ўзбекистон терма жамоаси жами 14 та медаль билан умумий рейтингда 10-ўринни эгаллаб турибди. Рейтингда Хитой терма жамоаси 115 та медаль билан яққол пешқадамлик қилмоқда. Ҳозирча кучли учликдан Буюк Британия ва АҚШ терма жамоалари ўрин олган.