Qirgʻizistonda Rossiyaga bogʻliq yangi «Nomad» telekanali ochiladi

Kanal uchun xodimlarni asosan Rossiyaning Sputnik agentligida ishlagan muharrirlar toʻplamoqda. Sputnik Qirgʻizistonning bosh muharriri Erkin Alimbekov yangi kanalga oʻtgan, uning rafiqasi Svetlana Akmataliyeva esa xodimlarni oʻqitmoqda.

«Nomad»ga UTRK va «7-kanal»dan ham qator jurnalistlar yuqori oylik sabab oʻtgani aytilmoqda. Moliya manbalari ochiqlanmagan, ammo loyihaga Rossiya mablagʻ yoʻnaltirayotgani haqida taxminlar bor.

Kanalning prodyuseri — RTda ishlagan rossiyalik Anna Abakumova. U Rossiya okkupatsiya qilgan Ukraina hududlarida reportajlar tayyorlagan.

«Nomad»da ishlovchilar «Yevraziya» markazida oʻqitilayotgani aytilmoqda. Bu markaz 2024 yilda Rossiyada tashkil etilgan boʻlib, moliyaviy va taʼlimiy loyihalar bilan shugʻullanadi. Uni Ilan Shor moliyalashtirishi maʼlum.

Ekspertlar fikricha, «Nomad» Rossiyaning Qirgʻizistondagi taʼsirini kuchaytirishga qaratilgan. Mamlakatda avvaldanyoq Rossiya kanallari — «Pervыy kanal», «Rossiya 24», «Kultura», «Zvezda» va Sputnik faol tarzda axborot tarqatib kelmoqda.

Siyosatshunoslar buni «markaziy Osiyoda Rossiya taʼsirini saqlab qolishga qaratilgan axborot urushi elementlari» deb baholamoqda.