Qozogʻistonda benzin, suv, elektr energiyasi va gaz narxlarini oshirish taqiqlandi

Bosh vazir oʻrinbosari Oljas Bektenov raisligida oʻtgan yigʻilishda fuqarolarning farovonligini oshirish maqsadida beshta asosiy qaror qabul qilingani maʼlum qilindi.

Shu qarorga muvofiq, 16 oktabrdan boshlab AI-92 markali benzin va dizel yoqilgʻisi narxlarini koʻtarish taqiqlanadi, shuningdek, 2026 yilning birinchi choragi oxirigacha suv, elektr energiyasi va tabiiy gaz tariflarini oshirishga yoʻl qoʻyilmaydi.

Bundan tashqari, kichik va oʻrta biznes uchun soliq tekshiruvlari vaqtincha bekor qilinadi, hamda avtomobil xaridi uchun imtiyozli kreditlash dasturlari toʻxtatilmaydi.

Ipoteka sohasida ham aholining turar joyga ega boʻlish imkoniyatlarini kengaytirish rejalashtirilgan. Shu doirada har yili 7 ming harbiy oila uy-joyga ega boʻlishi uchun maxsus ipoteka dasturi qayta yoʻlga qoʻyiladi.

Qozogʻiston Milliy banki maʼlumotiga koʻra, mamlakatda inflyatsiya darajasi sentabr oyida 12,9 foizgacha oʻsgan, shu bois yillik asosiy foiz stavkasi 18 foizga koʻtarilgan.