Qozogʻistonda ayollar uchun ish vaqti qisqarishi mumkin

Tashabbus muallifi — deputat Ajar Sagandikova boʻlib, u bu borada bosh vazir Oʻljas Bektenov nomiga rasmiy soʻrov yuborgan.

Tengrinews nashrining maʼlum qilishicha, Sagandikovaning aytishicha, Qozogʻistonda ayollar har kuni oʻrtacha 480 daqiqa ish vaqtini, qoʻshimcha ravishda esa 246 daqiqa uy yumushlari va qarindoshlarga gʻamxoʻrlik qilishga sarflayapti.

Deputatning taʼkidlashicha, bu «kuniga 13 soatlik yuklama» boʻlib, ayollarning surunkali charchashi, hissiy toliqishi va sogʻliq muammolariga olib kelmoqda. Shuningdek, mamlakatda ayollar va erkaklar oʻrtasidagi 15 foizlik ish haqi tafovuti ularning iqtisodiy zaifligini yanada kuchaytiryotgani qayd etildi.

Sagandikova ogʻir kasal yoki alohida ehtiyojli qarindoshlarga qarayotgan ayollarning kuniga qoʻshimcha 6 soat mehnat qilishi «uchinchi ish kuni»ga aylanganini, ammo bu mehnat qonunchiligida aks etmaganini taʼkidladi.

Deputat Mehnat kodeksiga oʻzgartish kiritib, farzandlari yoki bemor qarindoshlariga qarayotgan ayollar uchun:

• ish haqi saqlangan holda qisqartirilgan ish haftasi,
• moslashuvchan grafik,
• masofaviy ishlash imkoniyatini ustuvor tartibda berish,
• kamsitishning oldini oluvchi meʼyorlar kiritilishini taklif qilmoqda.

Uning fikricha, bunday oʻzgarishlar ayollarni ijtimoiy va iqtisodiy jihatdan qoʻllab-quvvatlashda muhim qadam boʻladi.