Rossiyalik deputat "Sibir oʻzbeklar tarixiy vatani" degan gaplari uchun keskin tanqidga uchrad

KPRF Markaziy Qoʻmitasi rais oʻrinbosari Yuriy Afoninning URA.RU axborot agentligiga bildirishicha, Tagi-Zade partiya saflaridan allaqachon haydalgan va partiyaning hozirgi siyosiy yoʻnalishiga hech qanday aloqasi yoʻq.

"U partiya intizomi va etikasi buzilgani uchun bir necha yil oldin KPRFdan chiqarilgan. Biz endi uni hech qachon nomzod sifatida koʻrsatmaymiz. Uning bu fikrlari partiyaning pozitsiyasiga mos kelmaydi va bu shaxsiy nuqtai nazar", — dedi Yuriy Afonin jurnalistlar bilan suhbatda.

Shuningdek, Davlat Dumasi deputati, KPRF aʼzosi Mixail Matveyev ham Tagi-Zade bayonotiga keskin munosabat bildirdi:

"Bu provokator KPRFdan chiqarilgan va partiyamizga aloqasi yoʻq. Uning bemaʼni gaplari partiyamiz pozitsiyasini ifodalamaydi. U bunday gaplarni shunchaki aytgan emas – bu aslida Rossiyaga qarshi hujum. Bu mahalliy aholining tugʻilish darajasi va oʻlim koʻrsatkichi muhokama qilinayotgan paytda aytilgan. Yaʼni u migrantlar orqali tub aholining oʻrnini bosish gʻoyasini ilgari surmoqda. Oʻzbeklarning ushbu hududda ʼtarixiy huquqlariʼ bor degan iddaosi esa, koʻp hollarda maxsus tayyorlangan metodikaga oʻxshaydi. FSB bunga eʼtibor qaratishi lozim – bu yashirin separatizm belgisidir", — deb yozdi Matveyev oʻzining Telegram-kanalida.

Avvalroq, Chelyabinsk viloyatidan Davlat Dumasi deputati Stanislav Naumov ham Tagi-Zadeni tanqid qilgan edi. U deputatning "oʻzbek migrantlari XMAOga tarixiy vatani sifatida qaytishi mumkin" degan soʻzlarini parlamentdan chetlatish uchun asos boʻlishi kerak, deb hisoblaydi.

Eslatib oʻtamiz, Tagi-Zade ushbu fikrlarini XMAO Dumasi yigʻilishida bayon etgan. U oʻz chiqishida Sibir xoni Quchum va Shayboniylar sulolasiga murojaat qilib, XMAO hududini oʻzbeklarning tarixiy yurti deb atagan. Bu esa hamkasblari va jamoatchilik orasida keskin norozilikka sabab boʻldi.