Rossiyaning Amur oblastida yoʻlovchi samolyot yoʻqolib qoldi

Amur oblastida An-24 yoʻlovchi samolyoti yoʻqolib qoldi, deb xabar berdi 24 iyul kuni «Interfaks» favqulodda xizmatlarga tayanib.

An-24 samolyoti Xabarovsk-Blagoveshchensk-Tinda yoʻnalishi boʻyicha uchgan. Agentlik suhbatdoshining soʻzlariga koʻra, qoʻnish arafasida havo kemasi bilan aloqa yoʻqolgan.

Baza telegram-kanali maʼlumotlariga koʻra, An-24 qoʻnishga tayyorgarlik koʻrgan, biroq birinchi urinishda qoʻna olmagan va ikkinchi aylanishga ketgan, shundan soʻng u bilan aloqa uzilgan.

Shot maʼlumotiga koʻra, yoʻqolgan samolyot «Angara» aviakompaniyasiniki boʻlgan.

Rossiya FVV qidiruv ishlari uchun Mi-8 vertolyoti va quruqlikdagi xizmatlar yuborilganini maʼlum qildi.

Amur oblasti rahbari Vasiliy Orlovning maʼlum qilishicha, samolyot bortida jami 49 kishi boʻlgan. Shundan 43 nafari yoʻlovchi (besh nafari yosh bolalar), 6 nafari ekipaj aʼzolaridir.

Rossiya Tergov qoʻmitasi holat yuzasidan jinoiy ish qoʻzgʻatilganini maʼlum qildi.