Рус сиёсатчиларининг ташаббусларини қўллаб-қувватлашимиз керак — Алишер Қодиров
Жорий йилнинг 29 июль куни россиялик сиёсатчи, ЛДПР партияси етакчиси Леонид Слуцкий ТАСС томонидан ташкил этилган матбуот анжуманида Марказий Осиёдан келиб, Россияда ишловчи мигрантлар учун мажбурий хулқ–атвор қоидалари тўпламини, яъни "Муҳожирлар кодекси"ни ишлаб чиқиш бўйича таклиф берганини маълум қилди. Мазкур таклифга Ўзбекистон Миллий тикланиш партияси раиси Алишер Қодиров ижобий муносабат билдирди. Хўш, Слуцкий томонидан илгари сураётган "Муҳожирлар кодекси"да нималар қайд этилган? Қодиров россиялик ҳамкасби илгари сураётган таклифни нега қўллаб–қувватламоқда?
Rus siyosatchilarining tashabbuslarini qoʻllab-quvvatlashimiz kerak — Alisher Qodirov
Россиялик сиёсатчи Леонид Слуцкий шу йилнинг 29 июль куни ТАСС (Россиянинг энг йирик ахборот агентликларидан бири) томонидан ташкил этилган матбуот анжуманида Россияга ишлашга келган муҳожирлар учун мажбурий хулқ-атвор қоидалари тўпламини, яъни "Мигрант кодекси"ни шакллантиришни таклиф қилди.
"Яширин миграция оқимларига қарши кураш тажрибамизни умумлаштириб, ЛДПРда мамлакатимизнинг ҳуқуқий майдонида янги бир қадам ташлаш ва четдан келиб Россияда ҳалол меҳнат қилмоқчи бўлган чет эллик меҳнаткашлар учун мажбурий хулқ-атвор қоидаларини ўз ичига олувчи "Мигрант Кодекси"ни ишлаб чиқиш қарорини қабул қилдик", дея таъкидлаган у.
Бундан ташқари, Леонид Слуцкий юқоридаги ҳужжат Россия фуқароларининг истакларига асосланган партиявий қонунчилик ташаббусларига таянишини қўшимча қилган.
"Кодекснинг мазмунини диаспоралар(бир миллат ёки этник гуруҳ вакилларининг ўз ватанидан ташқарида, бошқа мамлакатларда яшаб, ўз маданиятини, тили ва анъаналарини сақлаб қолган жамоалари), ишчи мигрантлардан манфаатдор бизнес, шунингдек, ҳуқуқни муҳофаза қилиш органлари ва ҳукумат билан муҳокама қилишга тайёрмиз", дейди Слуцкий .
Ўзбекистон Олий Мажлис Қонунчилик палатаси депутати, "Миллий тикланиш" демократик партияси фракциясининг раҳбари Алишер Қодиров рус сиёсатчиларининг юқорида таъкидланган ташаббусларини қўллаб-қувватлашини билдирди. Бу ҳақда у ўзининг ижтимоий тармоқлардаги саҳифасида ёзди.
"Яқин келажакда кутилаётган беқарорлик, релокантларни жиддий ортиши эҳтимоллари фонида нафақат биз, бутун Марказий Осиё минтақасини Россия билан виза орқали кириш-чиқиш қилиш, иш излаб бораётганларга талаблар ва назоратни кучайтириш ҳақидаги рус сиёсатчиларининг ташаббусларини қўллаб-қувватлашимиз керак деб ўйлайман", дейди Қодиров.
Шунингдек, у Ўзбекистонда яшайдиган ҳамма ўзбек тили, маданияти ва маҳаллий қадриятларни билиши ва ҳурмат қилиши керак деб ҳисоблашини, хорижга иш излаб бораётган ўзбекистонликлар ҳам маҳаллий тил, маданият, қонунлар ва қиладиган ишини яхши билиши зарурлигини билдирган.
"Бу билан ҳақини ҳимоя қила олмайдиган, маҳаллий айирмакашлар томонидан камситилишга рози бўлаётган, энг ёмони, ихтиёрий-мажбурий, масъулиятсизларча ҳаётини сотиб юбориб Ўзбекистон учун жиддий ижтимоий, сиёсий, иқтисодий юк яратаётган айрим фуқароларимизга ҳам ёрдам берган бўламиз", дейди депутат.
Маълумот учун, "Муҳожирлар кодекси"да ишчи мигрантларнинг рус тилини билиши, агар уларнинг оиласи Россияда яшаса, оиласини рус тилига ўргатиши, Россия маданияти ва анъаналарига ҳурмат билан қараши, шунингдек, жамоат жойларида хулқ-атвор қоидаларига риоя қилишини талаб этилган.
Бундан ташқари, чет элликлар расмий равишда ишга жойлашиши, солиқ тўлаши, иш рухсатномасини олиши, депортация ёки бадарға хавфининг суғуртасига эга бўлиши, шунингдек, бармоқ изи, геном бўйича рўйхатга олиш ва руҳий текширувдан ўтиши керак.
