Samarqandda zamonaviy avtovokzal foydalanishga topshirildi

Samarqand shahrining Choʻpon-ota hududida davlat-xususiy sheriklik asosida barpo etilgan yangi Samarqand avtovokzalining ochilish marosimi boʻlib oʻtdi. 

Unda viloyat hokimi vazifasini bajaruvchi Adiz Boboyev, soha mutaxassislari, keng jamoatchilik vakillari, nuroniylar hamda ommaviy axborot vositalari xodimlari ishtirok etishdi. Mehmonlar avtovokzalda yoʻlovchilar uchun yaratilgan sharoitlar bilan tanishdilar.

Ushbu loyihani amalga oshirish uchun 12 million AQSh dollari miqdorida mablagʻ yoʻnaltirildi. Yangi avtovokzal zamonaviy arxitektura, energiya tejamkor yechimlar va xavfsizlik standartlari asosida qurildi.

Bu yerda yoʻlovchilar uchun barcha qulayliklar yaratildi. Keng va yorugʻ kutish zali, ona va bola xonasi, bolalar maydonchasi, tibbiyot xonasi, elektron tablolar orqali qatnovlar jadvalini koʻrsatish, imkoniyati cheklangan fuqarolar uchun maxsus panduslar va yoʻlaklar, avtobus, mikroavtobus va yoʻnalishsiz taksilar uchun alohida kutish maydonlari, haydovchilar dam olish xonasi, avtotransportni texnik koʻrikdan oʻtkazish xizmati, 24 soat ishlovchi videokuzatuv tizimi shular jumlasidandir.

Avtovokzal nafaqat transport markazi, balki keng koʻlamli xizmat koʻrsatish va savdo hududi sifatida ham faoliyat yuritadi. Bu yerda 120 ta savdo doʻkoni, 3 ta zamonaviy restoran, 14 ta servis shoxobchasi, 1 ta avtosalon, 2 ta mehmonxona joylashgan. Yangi avtovokzalning ishga tushirilishi natijasida 300 nafar aholi uchun doimiy ish oʻrni yaratildi.

Avtovokzal bir vaqtning oʻzida 100 ta avtobus, 150 ta mikroavtobus va 300 ta yengil avtomobilni qabul qilishga moʻljallangan. Avtovokzaldan Toshkent, Jizzax viloyatlariga avtobuslar harakati amalga oshirilmoqda. Shuningdek, Toshkent shahridan Buxoro, Navoiy, Xorazm, Qashqadaryo, Surxondaryo viloyatlariga qatnovchi avtobuslar ham mazkur avtovokzal orqali harakatni davom ettirmoqda.

Avtovokzal ochilish marosimida viloyat hokimi vazifasini bajaruvchi Adiz Boboyev soʻzga chiqib, loyihaning amalga oshirilishi viloyatda transport xizmatlari sifatini yangi bosqichga olib chiqishi, shaharlararo, viloyatlararo va xalqaro qatnovlarning samaradorligini oshirishi hamda aholining vaqt va xarajatlarini tejashga xizmat qilishini taʼkidladi.

Samarqand avtovokzali kelgusida nafaqat respublika ichida, balki xalqaro yoʻnalishlarda ham muhim transport markaziga aylanishi kutilmoqda. Bu esa Samarqand shahrining logistika, transport va sayyohlik salohiyatini yanada oshiradi.