Saudiya Arabistonida oilaviy zoʻravonlik qurboni boʻlgan fuqaro Oʻzbekistonga qaytarildi

Oʻzbekiston elchixonasi koʻmagida Saudiya Arabistonining Dammam shahrida oilaviy zoʻravonlik qurboni boʻlgan hamyurtimiz R.G. Vatanga qaytarildi, deb xabar qilmoqda "Dunyo" AA muxbiri.

Oʻzbekiston diplomatik missiyasidan olingan maʼlumotlarga koʻra, Dammam shahrida uzoq yillardan buyon istiqomat qilib kelgan va xorijlik turmush oʻrtogʻining gʻayriinsoniy tazyiqi ostida qolgan R.G. Oʻzbekistonga qaytarishni soʻrab ariza bilan murojaat qilgan.

Oʻzbekiston elchixonasi va Saudiya Arabistoni Tashqi ishlar vazirligi hamkorligida amalga oshirilgan ishlar natijasida R.G.ning Saudiyadan chiqishi uchun viza rasmiylashtirildi.

Shundan soʻng, u "Dammam-Sharja-Toshkent" aviareysi bilan Oʻzbekistonga kuzatib qoʻyildi.