Saudiya Arabistonidagi deportatsiya markazida saqlanayotgan Oʻzbekiston fuqarolari vatanga olib kelindi

Mamlakat Bosh konsulxonasi, Oʻzbekiston Din ishlari boʻyicha qoʻmitasi va "Uzbekistan Airways" AJ hamkorligida Saudiya Arabistonining Makka shahridagi "Ash-Shumaisiy" deportatsiya markazida boʻlib turgan Z.Sh. va uning farzandlari yurtimizga qaytarildi, deb xabar bermoqda "Dunyo" AA muxbiri.

Bosh konsulxona xodimlari Saudiya Arabistonidagi "Ash-Shumaisiy" deportatsiya markazi direktori Abdulatif as-Samaliy bilan ushbu oilani Oʻzbekistonga yuborish boʻyicha bir necha bor muzokara oʻtkazdi. Muzokaralar natijasida vatandoshlarimizni Oʻzbekistonga qaytarish boʻyicha kelishuvga erishildi.

Oʻzbekiston Din ishlari boʻyicha qoʻmitasi, Bosh konsulxona va "Uzbekistan Airways" AJ tomonidan Z.Sh. va uning farzandlariga mamlakatimiz ziyoratchilari uchun ajratilgan "Jidda-Toshkent" yoʻnalishidagi charter reysiga aviabilet sotib olib berildi. Mazkur oila 24 avgust kuni Oʻzbekistonga yetib oldi.

Ushbu jarayon mamlakatimizda 30 iyuldan 30 avgustgacha eʼlon qilingan "Vatanga qaytarish" insonparvarlik aksiyasi hamda Oʻzbekistonning Jiddadagi Bosh konsulxonasi tomonidan Saudiya Arabistonida boʻlib turgan yurtdoshlarimizning huquq va manfaatlarini himoya qilishga boʻlgan masʼuliyatli yondashuvning samarali natijasi boʻldi.