Shavkat Mirziyoyev AQShga amaliy tashrif bilan yetib bordi

Davlat rahbarini AQSh davlat kotibining oʻrinbosari Kristofer Landau, AQSh–Oʻzbekiston savdo palatasi raisi Kerolin Lemm hamda boshqa rasmiy shaxslar kutib oldi.

Shuningdek, Mirziyoyev AQShda tahsil olayotgan va faoliyat yuritayotgan bir guruh oʻzbekistonliklar bilan suhbat qilib, vatandoshlarimizga oʻz ezgu tilaklarini bildirdi.

Tashrifning asosiy tadbirlari 5–6 noyabr kunlari boʻlib oʻtadi. Shu kunlarda Prezident Mirziyoyev AQSh Prezidenti Donald Tramp bilan muzokaralar olib boradi hamda Markaziy Osiyo mamlakatlari va AQSh yetakchilarining “C5+1” formatdagi sammitida ishtirok etadi.

Dasturdan AQSh Kongressi va hukumati vakillari bilan uchrashuvlar, shuningdek, yetakchi Amerika kompaniyalari rahbarlari bilan muzokaralar hamda ishbilarmon doiralar ishtirokidagi davra suhbati ham oʻrin olgan.

Ushbu sammit Tramp ishtirokidagi ilk “C5+1” uchrashuvi boʻladi. Avvalgi shunday formatdagi sammit 2023 yil sentabr oyida, oʻsha paytdagi AQSh Prezidenti Jo Bayden raisligida oʻtkazilgan edi.

Eslatib oʻtamiz, joriy yil sentabr oyida Shavkat Mirziyoyev va Donald Tramp telefon orqali muloqot qilib, mintaqaviy hamkorlikni chuqurlashtirish masalalarini muhokama qilgan edilar. Sentabr oyi oxirida esa ular Nyu-York shahrida uchrashib, Oʻzbekiston–AQSh strategik sheriklik munosabatlarini yanada rivojlantirishga kelishib olgan edilar.