Shavkat Mirziyoyev Jahon banki bilan sheriklikning ustuvor yoʻnalishlarini qayd etdi

Muzokaralar avvalida yuqori martabali mehmon Oʻzbekiston rahbariga Jahon banki guruhi prezidenti Ajay Banganing salomi va eng ezgu tilaklarini yetkazdi hamda "Kambagʻallikdan farovonlik sari" xalqaro forumi muvaffaqiyatli tashkil etilgani bilan tabrikladi.

Jahon banki bilan strategik sheriklikni, eng avvalo, Barqaror rivojlanishning birinchi maqsadi boʻlmish kambagʻallikka qarshi kurashish sohasida yanada kengaytirish masalalari koʻrib chiqildi.

Ushbu global moliyaviy institut bilan amaliy hamkorlikda yuksak darajaga erishilgani katta mamnuniyat bilan qayd etildi.

Mamlakat dasturi muvaffaqiyatli amalga oshirilmoqda. Oʻzbekiston bankning makromintaqadagi yetakchi hamkorlaridan biridir. Loyihalar portfeli 14 milliard dollardan oshdi.

Jahon bankining faol koʻmagida kambagʻallik darajasini aniqlash metodologiyasi ishlab chiqildi. Ayni paytda Oʻzbekistonda kambagʻallik va tenglik koʻrsatkichlari birgalikda diagnostika qilinmoqda.

"Kambagʻallikdan farovonlik sari" dasturini amalga oshirish doirasida xotin-qizlar va yoshlar uchun ish oʻrinlari yaratish, shahar va qishloqlarning ijtimoiy infratuzilmasini modernizatsiya qilish, turizmni rivojlantirish boʻyicha amaliy chora-tadbirlarni oʻz ichiga olgan qoʻshma loyiha tayyorlash taklif qilindi.

Xususiy sektor loyihalarini ilgari surish, oʻrta muddatli rivojlanish dasturlarini ishlab chiqish, aholini roʻyxatga olish va boshqa ustuvor yoʻnalishlarga alohida eʼtibor qaratildi.