Afgʻonistonda Jahon banki faoliyati qayta tiklandi — «Tolibon»

Bu haqda Afghanistan International xabar berdi.

Jahon banki hozircha rasmiy izoh bermagan. Biroq «Tolibon» tomoni Jahon banki pudratchi kompaniyalarning 45 million dollar miqdoridagi qarzlarini toʻlab berishni oʻz zimmasiga olganini bildirgan. Moliya vazirligi bayonotiga koʻra, bank 2021 yil avgustidan oldin hujjatlari rasmiylashgan va yakunlangan loyihalar boʻyicha toʻlovlarni amalga oshirish majburiyatini qabul qilgan.

Afgʻoniston Islom Respublikasi qulaganidan va hukumat «Tolibon» qoʻliga oʻtganidan keyin Jahon banki mamlakatdagi faoliyat shaklini oʻzgartirgan edi. Shu vaqtdan beri u «Tolibon» nazoratidagi davlat idoralari bilan toʻgʻridan-toʻgʻri hamkorlikni toʻxtatgan, yordamlarni esa asosan YuNISEF, Jahon oziq-ovqat dasturi va Afgʻonistonni qayta qurish jamgʻarmasi orqali yoʻnaltirib kelgan. Buning maqsadi moliyaviy yordamning toʻgʻridan-toʻgʻri aholiga yetib borishini taʼminlash edi.

Toʻrt bosqichli toʻlov jarayoni

«Tolibon» Moliya vazirligiga koʻra, Jahon banki bilan tuzilgan shartnomalar boʻyicha bir qator loyihalar va kompaniyalarga toʻlovlarni qaytarish jarayoni boshlangan. Ularning hujjatlari Jahon banki monitoring guruhi va Moliya vazirligi tomonidan koʻrib chiqilgan.

Qarzlarni qoplash quyidagi toʻrt bosqichda amalga oshiriladi:

– birinchi bosqichda 9,3 million dollar toʻgʻridan-toʻgʻri xorijiy pudratchi kompaniyalarga toʻlanadi;
– ikkinchi bosqichda Jahon banki 16,8 million dollarni «Tolibon» Moliya vazirligi orqali pudratchilarga toʻliq oʻtkazadi.

Moliya vazirligi maʼlumotiga koʻra, toʻlovlarning dastlabki ikki bosqichi amalda boshlangan, uchinchi va toʻrtinchi bosqichlar ham tez orada yoʻlga qoʻyiladi.