Janubiy Koreya o‘z hududida atom suvosti kemalarini quradi

Janubiy Koreya atom suvosti kemalarini o‘z mamlakatida quradi. Bu haqda mudofaa vaziri ma’lum qilib, birinchi kema 2030-yillar o‘rtalarida suvga tushirish rejalashtirilayotganini aytdi.

Seul yadroviy qurolga ega Shimoliy Koreyaga qarshi tiyib turish siyosatini kuchaytirishga intilmoqda. 

Janubiy Koreya AQShdan cheklangan miqdordagi yadro yoqilg‘isini yetkazib berishga ruxsat olgach, atom suvosti kemalariga ega bo‘lgan sanoqli davlatlar safiga qo‘shiladi.

“Biz 2030-yillar o‘rtalarida birinchi kemani suvga tushirish uchun o‘z texnologiyalarimiz asosida atom suvosti kemalarini ishlab chiqamiz va quramiz”, — dedi mudofaa vaziri An Gyu Bak prezident Li Chje Myon ishtirok etgan mudofaa strategiyasiga bag‘ishlangan yig‘ilishda.

Li noyabr oyida Seul uzoq kutilgan xavfsizlik va savdo kelishuvi doirasida yadroviy suvosti kemalarini qurish uchun Vashingtonning roziligini olganini ma’lum qilgandi.

Bu ruxsatnomaga AQSHning uranni boyitish va ishlatilgan yoqilg‘ini qayta ishlashga roziligi ham kiradi.

Biroq, suvosti kemalarining qayerda qurilishi haqida aniq bir ma’lumot shu paytgacha yo‘q edi.  Tramp esa ular AQSHda qurilishini aytgandi.

Yadro reaktorlariga ega Janubiy Koreya suvosti kemalari uchun kam boyitilgan uranni xarid qilish va undan foydalanish jarayonida yadroviy qurolni tarqatmaslik majburiyatlariga amal qilishini ma’lum qildi.

“Koreya Respublikasi yadro qurolining hech bir turiga ega emas va uni qat’iy ishlab chiqarmaslik pozitsiyasida”, — dedi An.

Lining ta’kidlashicha, atom suvosti kemalari “Koreya yarimorolida tinchlik va xavfsizlik uchun mas’uliyatni zimmasiga olishga bo‘lgan qat’iyat timsoli”dir.

AQSh yadroviy suvosti kemalari texnologiyasi eng maxfiy va qattiq qo‘riqlanadigan harbiy sir sanaladi.