Prezident yigʻilishda ikki tuman hokimini ishdan olishga buyurdi

 Bu haqda Prezident Shavkat Mirziyoyev raisligida boʻlib oʻtgan yigʻilishda maʼlum qilindi.

Denov: katta mablagʻ, lekin natija yoʻq

Surxondaryoning Denov tumaniga Uzun tumaniga nisbatan 4,5 baravar koʻp mablagʻ ajratilganiga qaramay, kambagʻallikni qisqartirish borasida sezilarli natija kuzatilmagan.

Kambagʻal oilalar reyestriga kirgan 1200 ta oilaning daromadi bir yildan beri oʻzgarmagan. Shu sababli Denov tumani hokimi Ilhom Abrorov va uning birinchi oʻrinbosari Sh.Toʻraqulov lavozimidan ozod qilindi.

Chiroqchi: aholini majburan kreditga jalb qilish tanqid qilindi

Qashqadaryodagi Chiroqchi tumaniga joriy yil tadbirkorlikni rivojlantirish uchun 309 mlrd soʻm kredit resursi ajratilgan. Biroq hokimlik aholiga imkoniyatiga yarasha tayyor loyihalar taklif qilish oʻrniga, odamlarni yoppasiga kredit olishga majburlayotgani Prezident tomonidan keskin tanqid qilindi.

«Shuncha resurs bilan odamlarga tayyor loyiha berish oʻrniga aholini kredit olishga majburlayapti. Uning qaytimini oʻylagani ham yoʻq», - dedi Mirziyoyev.

Shu bois Chiroqchi tumani hokimi Fayzulla Yusupov va birinchi oʻrinbosari Zafar Ergashev ishdan olindi.

Yana 20 ta tuman hokimi boʻyicha chora koʻriladi

Yigʻilishda ayrim tumanlarda bandlik masalalarida «jiddiy kamchiliklar va koʻzboʻyamachilik» aniqlangani taʼkidlandi.

Bosh vazirga quyidagi 20 tuman hokimiga nisbatan belgilangan tartibda chora koʻrish topshirildi:
Yashnobod, Buxoro, Gʻijduvon, Koson, Xatirchi, Qumqoʻrgʻon, Yangiyol, Oʻzbekiston, Guliston, Yakkabogʻ, Andijon, Parkent, Toshkent, Nurobod, Uchtepa, Chortoq, Davlatobod, Oltinkoʻl, Qiziriq, Kogon.

Maʼlumot uchun:

• Ilhom Abrorov — 2023 yil yanvaridan beri Denov tumaniga rahbarlik qilgan.
• Fayzulla Yusupov — 2023 yil avgustida Chiroqchi tumani hokimi etib tayinlangan.