Futbol bo‘yicha 2026-yilgi jahon chempionatini Xitoy va Hindiston ko‘rolmasligi mumkin

Dunyoning aholisi eng ko‘p bo‘lgan ikki davlatidagi millionlab futbol muxlislari Hindistonda translyatsiya huquqi bo‘yicha muzokaralar boshi berk ko‘chaga kirib qolgani va Xitoyda bu borada rasmiy qaror qabul qilinmagani sababli kelasi oy boshlanadigan futbol bo‘yicha Jahon chempionatini tomosha qila olmasligi mumkin.

Na Hindistonda, na Xitoyda translyatsiya bo‘yicha kelishuv e’lon qilingani yo‘q. Vaholanki, FIFA ma’lumotlariga ko‘ra, 2022-yilgi Jahon chempionati vaqtida dunyo bo‘yicha raqamli va ijtimoiy platformalardagi jami ko‘rishlarning 49,8 foizi Xitoy hissasiga to‘g‘ri kelgan.

FIFA kamida 175 ta mamlakatdagi teleradiokompaniyalar bilan shartnomalar tuzganini ma’lum qildi.

“Xitoy va Hindistonda FIFA Jahon chempionati–2026 mediahuquqlarini sotish bo‘yicha muzokaralar davom etmoqda va hozircha bu ma’lumot maxfiy qolishi kerak”, — deyiladi bayonotda.

Ayni bosqichda Hindiston yoki Xitoy bilan translyatsiya bo‘yicha tasdiqlangan shartnomaning yo‘qligi noodatiy holatdir.

O‘tgan jahon chempionatlarida, jumladan, 2018 va 2022-yillarda Xitoyning CCTV davlat teleradiokompaniyasi huquqlarni ancha oldin qo‘lga kiritib, musobaqa boshlanishidan bir necha hafta avval reklama materiallari va homiylar reklamalarini efirga uzatishni boshlagan edi.

2026-yilgi turnir 11-iyun kuni boshlanadi, bu esa kelishuvni yakunlash, translyatsiya infratuzilmasini yo‘lga qo‘yish va reklama shartnomalariga erishish uchun atigi besh hafta vaqt qolganini anglatadi.