Paula Bento Oʻzbekiston milliy jamoasini boshqarishi mumkin

“Oʻzbekiston futbol assotsiatsiyasi (UFA) xalqaro maydonda 2026 yilda mamlakat tarixidagi ilk FIFA Jahon Chempionati ishtirokiga tayyorlay oladigan nufuzli murabbiy qidirib kelmoqda. Dastlab ular 2014 yil Jahon Chempionatida gʻolib boʻlgan Yoaxim Lyovga murojaat qilishdi, biroq nemis mutaxassisi Toshkentdan kelgan jiddiy takliflarga qaramay rad javobini berdi. Turkiya terma jamoasining sobiq tajribali murabbiyi Fatih Terim bilan ham aloqaga chiqildi, biroq u hali rozi boʻlmadi.

Endi eʼtibor 56 yoshli portugaliyalik strateg Paulo Bentoga qaratildi. Uning rezyumesi klub va xalqaro futbol tajribasiga boy”, — deya yozadi nashr.

Bento murabbiylik faoliyatini Lissabondagi “Sporting” klubida boshlagan. Keyinchalik Braziliyada “Kruzeiro”, Gretsiyada “Olimpiakos” hamda Xitoyda “Chongqing Lifan” jamoalarini boshqargan. Ammo aynan milliy jamoalar darajasidagi tajribasi Oʻzbekiston uchun uni jozibador nomzodga aylantirmoqda.

U 2010–2014 yillarda Portugaliya terma jamoasini boshqargan va 2012-yilgi Yevro turnirida jamoani yarim finalga olib chiqqan. Keyinchalik Janubiy Koreya terma jamoasini 2022-yilgi Qatar Jahon Chempionatida 1/8 finalga olib chiqib, Osiyoda katta obroʻ qozondi. Soʻnggi paytlarda esa Birlashgan Arab Amirliklari terma jamoasini boshqarib, kengaytirilgan 2026-yilgi jahon chempionati saralashidan oʻtkazishga harakat qildi.

Nashrning yozishicha, murabbiyning qarori kelgusi haftalarda hal qilinishi mumkin.

“Bento Markaziy Osiyoning yetakchi jamoasini boshqarish chaqirigʻini qabul qiladimi, yoʻqmi – buni vaqt koʻrsatadi. Ammo uning nomzodi muhokama qilinayotgani Oʻzbekistonning katta maqsadlarni koʻzlayotganidan dalolat beradi”, - deb yoziladi maqolada.